வெற்றியான தோல்வி...
என் உலகம்
உன்னால் சிருஷ்டிக்கப் படுகிறது
எனக்கு இடம் இல்லாமலே....
என் உடலின் வெப்பம்
உன்னால் போக்கப் போட்டது
என் உயிரின் அனுமதியில்லாமலே.....
என் ப்ரார்த்தனைகள்
எல்லாம் நிறைவேறுகிறது -
நீ நன்றாக இருக்கிறாய்.
என் காதல் கவிதைகள்
எல்லாம் சிலாகித்துப் பேசப்படுகிறது -
உன்னை மட்டும் சேரவில்லை.
என் வெற்றிகள் எல்லாம்
தோல்வியினால் மிதிக்கப்படுகிறது -
சமர்பித்தது உன் காலடியில் தானே.
என் நுரையீரல்
இன்னமும் சுவாசிக்காமலே காத்திருக்கிறது -
நீ விட்ட மூச்சுக் காற்றைத் தேடி.
எல்லாம் நீ
என்றிருந்த என்னை
நீ எனக்குக் காட்டினாய் -
என் பெயரிடப்பட்ட
உன் குழந்தையை அழைத்து.
உனக்குப் புரியாது,
இதுவும் எனக்குத் தோல்வி தான் -
பிரசவித்து வெளியேற்றி விட்டாய் என்னை.
Bookmarks