தமிழ்மன்றப் பண்பலை..

[அமரன்]

அன்பு மன்ற சொந்தங்களே..!!

மன்றத்தின் சொத்துகளாகிய சொந்தங்களின் படைப்பாற்றலுக்கு களங்களை அமைத்துக் கொடுக்க வேண்டிய கடமை மன்றத்துக்கு உண்டு. அமைத்துக் கொடுக்கும் களங்களை அழிந்து விடாமல் காக்கும் பொறுப்பு மன்ற மக்களுக்கு உண்டு.

அந்த வகையில், மன்ற மக்களுக்காக, ஒலிபரப்புக் களம் ஒன்றை அமைக்கும் முயற்சி கடந்த சில வாரங்களாக நடைபெற்றது. மன்ற செயற்குழுவினதும், மன்ற நிர்வாகக் குழுவினதும் ஆலோசனைகளும் உழைப்புகளும் கொண்டு அடித்தள வேலைகள் நிறைவு பெற்று விட்டன. சோதனை ஒலிபரப்பும் ஓரளவுக்கு திருப்தியானதாக உள்ளது. இப்போது பொதுவில் சோதனை ஒலிபரப்பை அறிமுகப்படுத்தும் காலம் கனிந்துள்ளது.

ஒக்டோபர் 2 ஆம் நாள் இந்திய நேரப்படி மாலை ஆறு மணி முதல் இரவு பத்து மணி வரை சோதனை ஒலிபரப்பை அன்பர்கள் கேட்கலாம் என்பதை மகிழ்வுடன் அறியத்தருகிறோம்.

இந்தப் பண்பலையின் நோக்கம் மன்ற மணிகளால் படைக்கப்பட்டவற்றை ஒலிப்பதிவில் கொண்டுவருதலே. அதை நோக்கிய பயணத்தில் அனைவரும் ஒன்றிணைவோம் என்ற உறுதிப்பாட்டுடன் இனிதே அனைவரும் பண்பலையில் சங்கமிப்போம்.

உங்கள் ஆலோசனைகள், உதவிகள் நிச்சயம் தேவை. நீங்கள் எந்த மாதிரிப் பங்களிக்க இருக்கின்றீர்கள் என்பதுவும் முக்கியமான தேவை. உங்கள் மனவோசைகள் இங்கே எழுத்தோட்டங்களாகட்டும். எழுத்தோட்டமான மன ஓசைகள் குரலோசைகளாகட்டும்.

உங்கள் உழைப்புடன் பண்பலை உற்சாகபாகப் பாயும் என்ற நம்பிக்கை மன்றத்துக்கு உண்டு.

அன்புடன்,

நிர்வாகக் குழு

செயற்குழு

பின்னர் சேர்த்தது. 02.10.2012

ஆர்வத்துடன் கருத்துரைத்த அனைத்து உள்ளங்களுக்கும் நன்றி.. மன்றப் பண்பலையில் அனைத்து மன்ற உறுப்பினரும் பங்காளர்கள் என்பதை பறைசாற்றும் வண்ணம் கருத்துகள் வந்திருக்கிப்பது மகிழ்வைத் தருகிறது. அதே மகிழ்வுடனும், உற்சாகத்துடனும் அடுத்த கட்டத்தையும் அரிவிப்பதில் மகிழ்ச்சி. அனைத்து உறுப்பினரும் பண்பலையின் பங்காளராக இருந்தாலும், அவர்களை ஒருங்கிணைத்து, தலைமை தாங்கிப் பண்பலையை நடத்திச் செல்ல ஒரு குழு அவசியம். அந்த வகையில் சிவா.ஜி, மதி, ஆதி ஆகிய மூவரையும் இணைத்து பண்பலை ஒருங்கிணைப்புக் குழுஉருவாக்கப்பட்டுள்ளது. இந்தக் குழு மன்ற உறவுகளை ஒருங்கிணைத்து பண்பலையை நடத்திச்செல்லும். பண்பலையின் வீச்சு பிரமாண்டமானதாக இருக்க வேண்டும் என்ற ஆசை எல்லாரிடத்திலும் இருக்கும். அதை நோக்கிய பயணத்தின் துவக்கமே இன்று.. எளிமையாகத் துவங்கும் பண்பலை நிதானமாக நகர்ந்து ஆழக் கால் பதித்து, நிலையெடுத்த பின்பு முழு வீச்சில் தன் பாய்ச்சலைக் காட்டும் என்பதை உறுதிபட உரைக்கலாம். அது வரை மனங்களும் மன்றமும் சோர்ந்து போகாமல் இணைந்து செயல்படுவோம். இனி... பண்பலைக் குழு முழுவீச்சில் தன் வேலையைத் துவங்கும். சோதனை ஒலிபரப்பைக் கேட்க இந்த இணைப்பை கிளிக்குங்கள். http://www.tamilmantram.com/fm விரைவில் மன்றத்திலிருந்தே கேட்கும் வசதியை உருவாக்க முயல்வோம். நன்றி. செயற்குழு.

[A Thainis]

நல்ல முயற்சி மனம் மகிழ்ந்து வரவேற்கிறேன், இத்தகைய மேலான பணியை மேற்கொண்ட மன்ற நிர்வாகிகளையும், செயற்குழுவையும் மனமார பாராட்டுகிறேன்.
பண்பலையில் நிச்சயம் எனது பங்களிப்பும் இருக்கும் என்பதை இங்கு பதிவுசெய்வதில் பெருமைகொள்கிறேன்.

மன்றமே எவ்வகை பங்களிப்பை உறுபினர்கள் மேற்கொள்ள வேண்டும் என்ற சில ஆலோசனைகளை வரிசைபடுத்தினால் நன்று, பிறகு அதையொற்றிய கருத்துகளை எங்களால் தெளிவாக கூறமுடியும். பண்பலை பட்டொளி வீசி காற்றில் தென்றலாய் பவனிவரட்டும்.

[அமரன்]

தைனிஸ்..உங்கள் ஈடுபாடு மகிழ்வைத் தருகிறது.நாம் எதிர்பார்ப்பவற்றைக் கொடுப்பதுதான் மன்றத்தின் பணி.. பண்பலையின் பணி.. நாம் என்ன எதிர்பார்க்கின்றோம், எப்படிப் பங்களிக்கப் போகிறோம் என்று நாம்தான் சொல்ல வேண்டும். தவிர, பாத்திரத்தைக் கொடுத்து விட்டு இதை நிரப்பினால் போதும் என்ற நிர்வாகத்தை தவிர்த்து இறைப்பதற்கு ஏற்ப பாத்திரங்களை உருவாக்குதல் என்ற நிர்வாக முறையைக் கடைப்பிடிக்கலாம் என்ற எண்ணமும் உண்டு. இந்த எண்ணம் தோன்றக் காரணம் நடைமுறை, மன்ற ஒழுங்குகளை மன்ற மக்கள் தாண்ட மாட்டார்கள் என்ற நம்பிக்கைத்தான்.எனவே, நீங்கள் எந்த வகையில் பங்களிக்கப் போகின்றீர்கள். எந்த மாதிரியான பண்பலையை எதிர்பார்க்கின்றீர்கள் என்று சொல்லுங்கள்.

[ஆதி]

மக்களே, தங்களின் மேலான ஆதரவும் ஆலோசனைகக்ளும் தேவை, இப்படி யாரும் எதுவும் சொல்லாமல் போனால் என்ன செய்வது

[சிவா.ஜி]

ஆஹா.....மன்றத்தின் அடுத்தக் கட்டப் பாய்ச்சல் பண்பலையாய் பரிமளித்திருக்கிறது. சொல்ல வார்த்தைகளில்லை. நிர்வாகத்தினருக்கு மனம்கனிந்த பாராட்டுக்கள்.

தொடர் ஒலிபரப்பாயிருக்கும் பட்சத்தில் சில நிகழ்ச்சிகளை குறிப்பிட்ட நேரத்துக்கு தினமும் ஒலிபரப்பலாம். கவிதை வாசித்தல், கதை சொல்லுதல்....கதைகளைத் தேர்ந்தெடுத்து அதை நாடக வடிவில் ஒலிபரப்புதல், சமையல் குறிப்புகள், சினிமா நேரம், இதயத்துக்குப் பிடித்த இசை என நிகழ்ச்ச்சிகள் இருக்கலாம். மேலும் பிழையின்றி தமிழ் பேசலாமென ஒரு நிகழ்ச்சியும் நடத்தலாம். புதிர் சொல்லி விடை கேட்கலாம்.

கதையை தேர்ந்தெடுத்துக் கொடுத்தால் அதை நாடகமாக்கித் தருகிறேன். குரலால் நடிக்கவும் தயார்.

[கீதம்]

விருப்பத்தோடு வினைபடுவீர்,
உரிமையோடு குரல்கொடுப்பீர்,
உடன்பிறவா உறவுகளே,
ஒன்றுபட்டு உடன்வாரீர்!

எழுத்துளியால் நம்மை
இதுவரை செதுக்கிய மன்றம்
ஒலிச்சிலை வடிக்கவும்
உளிதனைக் கைக்கொண்டு
உற்சாகமாய் அழைக்கிறது.

பண்புடை மக்கள் நாம்,
பண்பலையிலும் சாதிப்போம்!
நம் அகத்தையும் முகத்தையும்
நல்லெழுத்தால் அறியச்செய்தோம்,
இனி, நட்பின் குரலாலும்
நம் எண்ணம் அறியச்செய்வோம்!

விரைந்துவாரீர் தோழர்காள்!
மண்ணில் ஒளிரட்டும் ஏற்றமிகு எழுத்துக்கள்!
விண்ணில் ஒலிக்கட்டும் எழுச்சிமிகு எண்ணங்கள்!

[அமரன்]

வாங்க பாஸ்..

நேற்று இரவு கூட ஆதியும் நானும் பேசினோம்.. அண்ணன் இருந்தால் இன்னும் பலம் கூடினமாதிரி என்று.. நிச்சயம் உங்கள் உழைப்புத் தேவை..

ஆஹா.....மன்றத்தின் அடுத்தக் கட்டப் பாய்ச்சல் பண்பலையாய் பரிமளித்திருக்கிறது. சொல்ல வார்த்தைகளில்லை. நிர்வாகத்தினருக்கு மனம்கனிந்த பாராட்டுக்கள்.

தொடர் ஒலிபரப்பாயிருக்கும் பட்சத்தில் சில நிகழ்ச்சிகளை குறிப்பிட்ட நேரத்துக்கு தினமும் ஒலிபரப்பலாம். கவிதை வாசித்தல், கதை சொல்லுதல்....கதைகளைத் தேர்ந்தெடுத்து அதை நாடக வடிவில் ஒலிபரப்புதல், சமையல் குறிப்புகள், சினிமா நேரம், இதயத்துக்குப் பிடித்த இசை என நிகழ்ச்ச்சிகள் இருக்கலாம். மேலும் பிழையின்றி தமிழ் பேசலாமென ஒரு நிகழ்ச்சியும் நடத்தலாம். புதிர் சொல்லி விடை கேட்கலாம்.

கதையை தேர்ந்தெடுத்துக் கொடுத்தால் அதை நாடகமாக்கித் தருகிறேன். குரலால் நடிக்கவும் தயார்.

[கலையரசி]

"இந்தப் பண்பலையின் நோக்கம் மன்ற மணிகளால் படைக்கப்பட்டவற்றை ஒலிப்பதிவில் கொண்டுவருதலே."

தம்பி அமரனின் தமிழ் மன்றப்பண்பலை அறிவிப்பு இன்ப அதிர்ச்சியைக் கொடுத்தது. பத்தாம் ஆண்டு நிறைவில் யாரும் எதிர்பாராத விதமாக அடுத்தடுத்து வியப்பூட்டும் அறிவிப்புகள்! இந்தளவுக்கு மன்றத்துக்காக உழைக்கும் நிர்வாகிகளுக்கும் பொறுப்பாளர்களுக்கும் எவ்வளவு நன்றி சொன்னாலும் தகும்.


சிவாஜி சார் அருமையான யோசனைகளைக் கொடுத்திருக்கிறார். அவற்றில் பிழையின்றித் தமிழ் பேசக் கற்றுக்கொடுக்கும் யோசனை சூப்பர்! தமிழை வளர்ப்பதில் மன்றத்துக்கு முக்கிய பொறுப்பு உண்டு. புதிர் போட்டியில் அரிய தமிழ் சொற்களைச் சொல்லி அவற்றுக்கு விளக்கம் கேட்கலாம்.

இந்தப்பண்பலையின் நோக்கம் ஏற்கெனவே மன்றத்தில் படைக்கப்பட்டவற்றை ஒலி வடிவில் கொண்டு வருதல்] என்பதை அறிந்தேன். நேரங்கிடைக்கும் பட்சத்தில் மன்றத்தில் வெளியான கதை கவிதைகளைப் படித்துப் பார்த்து அவற்றில் மணியானவற்றைத் தேர்ந்தெடுப்பதில் நிர்வாகிகளுக்கு உதவ ஆசைப்படுகிறேன். ஒலி வடிவில் மாற்ற வேண்டிய படைப்புக்கள் பற்றி மன்ற உறுப்பினர்கள் ஆலோசனை சொல்ல ஒரு தனி திரியைத் துவங்கலாம்.

இக்காலக் கட்டத்தில் சிறுவர்களுக்குக் கதை சொல்ல பாட்டி தாத்தாக்கள் இல்லை. சிறுவர்க்கான நிகழ்ச்சியில் பாட்டிக் கதைகள் என நேரம் ஒதுக்கி கதை சொல்ல வேண்டும். அதற்கேற்றாற் போல் சிறுவர் கதைகள் பலவற்றை உறுப்பினர்கள் மன்றத்தில் படைக்க வேண்டும்.

கதைகளை நாடகமாக மாற்றவும் என்னால் முடிந்ததைச் செய்ய விழைகிறேன். மன்றக் கதைகளை நாடகமாக மாற்ற கதாசிரியரின் முன் அனுமதி பெற வேண்டுமா? அல்லது நமக்குப் பிடித்த கதைகளை அனுமதியின்றி நாடகமாக மாற்றலாமா என்பதைத் தம்பி அமரன் தெளிவுபடுத்தினால் நல்லது.
அக்டோபர் இரண்டாம் தேதி பண்பலையைச் செவிமடுக்க ஆவலாகக் காத்திருக்கிறேன்!

[Keelai Naadaan]

மன்றத்தின் புதிய முயற்சி ஆச்சர்யத்தையும், ஆனந்தத்தையும் தருகிறது.

மன்ற நிர்வாகத்தினரின் புதிய முயற்சிகளுக்கு மனப்பூர்வமான பாராட்டுக்கள்.

என்னாலும் பங்களிக்க முடியுமென்றால் இயன்றதை செய்ய விரும்புகிறேன்.

[அமரன்]

கலையக்கா.

உடன் உழைக்க முன் வந்தமை உற்சாகம் அளிக்கிறது.


மக்கள் தருகின்ற கருத்துரைகளின் அடிப்படையில் பண்பலை வடிவம் பெறும்..

அக்டோபர் இரண்டில் அடுத்த கட்ட நகர்வை நிர்ணயிக்கக் கூடியதாக இருக்கும் என்று நம்புகிறேன்.

[அமரன்]

கீழைநாடான்..

நிச்சயம் உங்கள் பங்களிப்பு பண்பலைக்கு அவசியம். அனைத்து மன்ற உறுப்பினரும் பண்பலைக் கலைஞர்கள்தான். சோதனை ஒலிபரப்பு முடிவடைந்ததும் திட்ட வரைபு ஒன்று முன் வைக்க காலம் கனியும் என்று நம்புகிறேன். அதிரடி வளர்ச்சியாக இல்லாமல் சீரான வரைபைக் காட்டும் வளர்ச்சியாக பண்பலைப் பாதை அமையும்.

[ஆதி]

கலை அக்கா, கீழை நாடன் மறுமொழிகள் எல்லாம் மேலும் உற்சாகத்தை தருகின்றன*

உறவுகளே, நம் ஒவ்வொருவரின் பங்களிப்பும் இதில் நிச்சயம் தேவை, இந்த பண்பலைத் தேரை இழுத்து செல்ல ஆளுக்கொரு கை கொடுப்பீர்கள் என்று நம்புகிறேன்

பண்பலை வெளியில் உங்கள் படைப்பு மயில்கள் ஒலிக்குரல் கொண்டு ஆடட்டும்