எப்பொழுது கையெழுத்திடுவாய்...........?
துப்பாக்கி பூப்பறிக்கும்
எதிரியின் கையில் இருக்கும் போது -
என்று தெரியும் உனக்கு.
தோழி நிலம் கொடுத்து,
நீ விதைத்து விளைந்த பூக்களை,
இருவரும் முத்தமிட்டு,
தொட்டு பேசித் தழுவிய
புன்னகை பூக்கும் பூக்களை
துப்பாக்கி பூப்பறிக்கும்.
ஆனாலும் நீ பொறுத்திட வேண்டும்.
ஓடி ஓடி நீ உழைத்து
கூடிக் கூடி நீ கட்டிய
கூட்டைக் கலைக்கும்
கூண்டோடு -
கூட்டில் பொறிப்பதற்குக்
காத்திருக்கும் உன் கனவுகளோடு.
ஆனாலும் நீ அமைதி காத்திட வேண்டும்.
உன் இணைப் பறவையின்
சிறகுகளை முறித்திடும்.
பறக்க முயற்சிக்கும் குஞ்சுகளின்
கழுத்தைத் திருகிடும்.
ஆனாலும் நீ இனியவனாக இருந்திட வேண்டும்.
ஆமாம் தோழனே!
எதிரி உன் கையில் சிக்கினால்
அவனை துன்பிக்கக் கூடாதாம் -
ஒப்பந்தம் ஒன்று இருக்கிறதாம் -
ஜெனீவா என்ற இடத்தில் கையெழுத்திட்டார்களாம்.
எப்பொழுது இவர்கள் கையெழுத்திடுவார்கள்?
பூக்களைப் பறிக்க மாட்டோமென்று,
கூட்டைக் கலைக்க மாட்டோமென்று,
பறவைகளைக் கொல்ல மாட்டோமென்று.....
எப்பொழுது இவர்கள் கையெழுத்திடுவார்கள்?
Bookmarks