யாதுமாகிறாய்..

[rema]

யாதுமாகிறாய்..

மண்ணில் பயிரை ஊன்றும் வேராய்..
எனது இலக்கினில் ஊன்றச் செய்கிறாய்!
ஊட்டத்தை உறிந்துத் தரும் வேர்ப்போல
நல்லவற்றை எனக்காய் பகிர்கிறாய்..

இலை, பூ, கனியைத் தாங்கும் தண்டாய்
எனைத் தாங்குகிறாய்.!என் இன்பதுன்பம்,
கோபம் எல்லாம் சேர்த்து..! நிலமேல்
மட்டுமிருக்கும் தண்டு..இது நியதி !

உணவை சேமிக்க இயல்பை மீறி
நிலத்தடி நீளும் சில தண்டுப்போல்...
நீயுமுன் இயல்பை மீறி அன்பாகிறாய்..
என் வெறுப்பினை மறந்து...!

தாயாய் முழுத் தருவிற்கும் உணவிடும்
இலைகளைப் போல் என்
தேவைகளை யெல்லாந் தருவாய்

அழகைக் கொடுத்து உருவம் சிதைத்து
கனியை உருவாக்கும் மலர்ப்போல்
எனக்காய் கொஞ்சம் சிதைந்து
என்னை இனியளாய் உருவாக்குகிறாய்...

விதையைப் பாதுகாக்கும் கனிப் போல்
எனைப் பாதுகாக்கிறாய்...
என்னை விருட்சமாக்க
நீ யாதுமாகிறாய்...

[ஆதி]

தாவர உவமைகளோடு இணை/இறை/தாய் பற்றிய கவிதை நன்று..

கவிதையை அங்கிங்கு கொஞ்சம் தட்டலாம், உரைநடை குறுக்கீடு இருக்கிறது..

தாவரங்களை ஒப்பிடுகையில் வார்த்தை செலவு அதிகமானதே அதன் காரணம்...

//என்னை விருட்சமாக்க
நீ யாதுமாகிறாய்...
//

இந்த வரி அபாரம், யாதுமாகிறாய் என்று சொல்வது எதையும் செய்ய தயாராக இருக்கிறாய் என்பதையும் சொல்கிறது..

வாழ்த்துக்கள்........ தொடர்ந்து படையுங்கள்..

[நாஞ்சில் த.க.ஜெய்]

வாழ்த்துகள் ..தாவரங்களை உவமையாக கொண்டு கவிதை கூறும் நற்கருத்து அருமை ...இதன் கவிதை நடை யில் மாற்றம் சிறிது தேவை என்பது என் கருத்து ...

[கீதம்]

மொத்தத்தில் நீ ஒரு மரம் என்று சொல்லாமல் சொல்கிறீர்கள்.

ரசிக்கத்தக்க அன்பின் வெளிப்பாடும், பொருத்தமான உவமைகளும் நன்றாக உள்ளன. பாராட்டுகள் மின்மினி.

[rema]

பின்னூட்டமிட்ட அனைவர்க்கும் மிக்க நன்றி

[ஆர்.ஈஸ்வரன்]

கவிதை சிறப்பு

[பூமகள்]

நான் இலை.. நீ கிளை..
நீ விழ வேண்டாம்..
நான் விழுவேன்..!!

- பாடல் வரிகளை நினைவூட்டியது உங்கள் கவிதை மின்மினி.

விளம்பர பலகைகளை ஆணியடித்து மாட்டி துன்புறுத்தினும் அமைதியாய் தாங்கும் மரம் போல் அமைதியாய் இருக்க வேண்டும் என்று சொல்ல வருகிறீர்களோ??

வாழ்த்துகள் மின்மினி.

[ஜான்]

நன்று