சந்தித்த வேளையில்....

[rema]

என் பழைய டைரியிலிருந்து...

சந்தித்த வேளையில்....

நீ பேசியதொன்றும் புரியவில்லை அன்பே !
நான் உன் பார்வையை
மொழி பெயர்த்துக்கொண்டிருந்ததால்.....

நீ பேசுவதை , மனம்
குறுந்தகடாய் பதிவு செய்யும்...
நீயில்லா பொழுதுகளில்
மீண்டும் மீண்டும் கேட்க !

நீ பார்த்தால்
என் உணர்வுகள் நடத்தும்
ஒத்துழையாமை இயக்கம்...

கண் பார்ப்பதை செவி கேட்பதில்லை..
கை செய்வதில் என் மனம் இல்லை...
உன்னால் என்
புலன்களுக்குள் உட்பூசலா ?

நம் பார்வை சந்திப்பில்...
வெளிநடப்பு செய்யும் உணர்வுகள்...

நீ காதல் சாணக்யன் அன்பே
பார்வைப் பகடையைப்
பொருளுடன் நகர்த்தி
எனை வீழ்த்துகிறாய் நிதமும் !

[M.Jagadeesan]

மின்மினியின் வித்தியாசமான காதல் கவிதைக்கு என்னுடைய பாராட்டுக்கள்!

[சான்வி]

சந்தித்த வேளையில்
சிந்திக்க வழியின்றி
மந்தித்த மதியின் நிலை
பற்றிய வரிகள் வான்மதியாய்
அழகோ அழகு மின்மினி

[Nivas.T]

காதல் அனுபவம் இங்கே கவிதை வரிகளாய் மின்னுகிறது

பாராட்டுகள் மின்மினி

[கீதம்]

காதலில் திளைத்த மனத்தின் அழகிய உணர்வுபூர்வ வெளிப்பாடு!

இன்னும் தொடரட்டும், இனிதே தொடரட்டும், மின்மினிகளென கவித்துளிகள்!

[rema]

கருத்திட்ட அனைவர்க்கும் நன்றி.

[சிவா.ஜி]

காதல் சொல்லும் வரிகள். காதல் உணர்வுகளை எத்தனை முறை, எப்படி சொன்னாலும் சுவை குறைவதில்லை.

மின்மினியின் வரிகளும் சுவைக்கிறது. வாழ்த்துக்கள்.

[அமரன்]

பழைய "டை"ரியிலிருந்து ஒரு காதல் பக்கம் புரண்டிருக்கிறது கவிதையாய்..

எதற்காக டைரி கையில் எடுக்கப்பட்டதோ?

மின்மினி வெளிச்சம் மன்றத்துக்கு அழகூட்டட்டும்.

[jaffer]

மலரும் நினைவுகள் அருமை

[Viduthalai]

உள்பூசிய காதல் நினைவுகளால்
உட்பூசல் புலன்களுக்குள்
உணர்வுகளின் ஒத்துழையாமை
உணர்வுகளின் வெளிநடப்பு
என சந்தித்த வேளையின் சிறப்பை
சிறப்பித்து விட்டீர்கள் மின்மினி.