வெகு உயரத்தில் பறந்துக் கொண்டிருக்கிறது
ஒரு சாம்பல் நிற கழுகு.
இறகுகளில் எந்த அசைவுமின்றி
ஒரு துறவியின் மௌனம் போல்
அத்தனை இலகுவாய் பறக்கிறது.
காற்றை கிழித்தபடி பறக்கும்
அதன் வேகம் ரசிக்கும்படியாகவும்
இரை தேடும் அதன் கண்களின் கூர்மை
பயப்படுத்தும்படியாகவும் இருக்கிறது.
மெல்ல மெல்ல உயரம் குறைத்து
தரையிறங்கும் போது
சிறு புள்ளியென இருந்தது
தூறல் மழையாதல் போல்
உருவம் கொண்டது.
பதுங்க முயன்று தோற்ற
ஒரு கோழிக்குஞ்சை
காற்றின் வேகத்தில் கடத்தி
சட்டென தூரம் கடந்த நொடியில்
வியப்பின் எல்லைக்கு கண்களை விரித்து
மிக உற்சாகமாய் சொல்கிறாய்
இதுவரை நீ காணாத
மிக அழகிய காட்சி இதுவென.
Bookmarks