காய்கறிகள் வாங்கிடவே
கடைவீதி சென்றிட்டேன்
காய்கறிகள் அனைத்துமே
காதலியை நினைவூட்ட
வாங்கும் வகையறியாது
ஏங்கியே நின்றிட்டேன்
வெண்டைக்காய் அரிந்திட்டால் காதலியின் பிஞ்சுவிரல்
வேதனையில் நோகுமென்று வாங்காது ஒதுக்கிட்டேன்
புடலங்காய் அரிந்திட்டால் காதலியின் கறுப்புநிற
சடைக்கேதும் வந்திடுமோ என்றஞ்சித் தள்ளிட்டேன்
மாம்பழம் அரிந்திட்டால் காதலியின் கன்னத்தில்
தீங்கேதும் வந்திடுமோ என்றஞ்சித் திடுக்கிட்டேன்
கோவைப்பழம் அரிந்திட்டால் காதலியின் உதடுகளில்
கோடேதும் விழுந்திடுமோ என்றஞ்சி விடுத்திட்டேன்
நாவற்பழம் தின்றிட்டால் காதலியின் கருவிழியில்
நோவேதும் வந்திடுமோ என்றஞ்சி நொந்திட்டேன்
வாழைத்தண்டு அரிந்திட்டால் காதலியின் கால்களிலே
வலுவேதும் குறைந்திடுமோ என்றஞ்சி வந்திட்டேன்
காய்ஏதும் வாங்காமல் வந்திட்ட எனைக்கண்டு
"பேய்ஏதும் பிடித்துளதா?" எனஅன்னைக் கேட்டிட்டாள்.
Reply With Quote
Originally Posted by அமரன்
Bookmarks