தோல்வியின் ரகசியம்

[கீதம்]

வார்த்தைச் சாட்டைகளை நீ
சொடுக்கும் ஒவ்வொருமுறையும்
புன்னகைத்து வைக்கிறேன்!

சொல்லம்பு தைத்த வேதனையை
உள்ளுக்குள் வாங்கிப் புதைக்கிறேன்!
ஆக்ரோஷம் மேலிட நீ முன்னேறும்போது
அமைதியாய் அடங்கிப்போகிறேன்!

என் எதிர்வினை வெறுமையாய்ப் போனதில்
திகைத்து நீ பின்வாங்குகிறாய்!
வெற்றிக்களிப்பில் நான்!

ஆனாலும்...
அடக்கிவைத்த என் துயரம் யாவும்
ஏதாவதொரு கண்ணீர்த்துளியில் வெளிப்பட்டு
என் தோல்வியை உன்னிடம் பறைசாற்றிவிடுமோ
என்று சிறிது அஞ்சத்தான் செய்கிறேன்!

[ஜானகி]

அருமை. அநுபவித்தவர்களுக்குத்தான் தெரியும், புரியும்.
நம்மைப் போல்தான் பிறரும் என்று தெரிவதில் தான் எத்தனை நிம்மதி !

[Hega]

அடக்கிவைத்த என் துயரம் யாவும்
ஏதாவதொரு கண்ணீர்த்துளியில் வெளிப்பட்டு
என் தோல்வியை உன்னிடம் பறைசாற்றிவிடுமோ
என்று சிறிது அஞ்சத்தான் செய்கிறேன்!

அடக்கி வைத்த உள் மனதினை அழகாக படம் பிடித்து காட்டி இருக்கின்றீர்கள். பாராட்டுக்கள்.

[நாஞ்சில் த.க.ஜெய்]

அழகான கவிதையில் தோல்வியின் வலியை கூறிய விதம் ....
என்றும் அன்புடன்
த.க.ஜெய்

[கீதம்]

அருமை. அநுபவித்தவர்களுக்குத்தான் தெரியும், புரியும்.
நம்மைப் போல்தான் பிறரும் என்று தெரிவதில் தான் எத்தனை நிம்மதி !

பின்னூட்டத்துக்கு நன்றி ஜானகி அவர்களே.

[கீதம்]

அடக்கி வைத்த உள் மனதினை அழகாக படம் பிடித்து காட்டி இருக்கின்றீர்கள். பாராட்டுக்கள்.

பாராட்டுக்கு நன்றி Hega.

[கீதம்]

அழகான கவிதையில் தோல்வியின் வலியை கூறிய விதம் ....
என்றும் அன்புடன்
த.க.ஜெய்

பின்னூட்டத்துக்கு நன்றி த.க.ஜெய் அவர்களே.

[அக்னி]

உணர்வுக்குக் கடிவாளம் போட்டு
மனதுக்குட் கட்டி வைப்பது
கடினமானது...

அவ்வுணர்வு
சோகம் என்றாகையில்
கண்கள் அழாதபோதும்,
இதழ்கள் கோணாதபோதும்
மனம் கேவிக்கேவி அழும்...

அந்த அழுகை,
மனக்கட்டுடைத்துப்
பாயும் வரையில்
திமிராகவும்,
பாய்ந்தால்
ஆற்றாமையாகவும்
கூடப் பெயரிடப்படும்...

புதைக்கப்படும் சோகம்
கோபமாக வெடித்துக் கிளம்பும்வரை..,
வீரம் காட்டப்பட்டுக்கொண்டேதான் இருக்கும்...

தென்றலின் வருடலைச் சுகிர்க்கலாம், புயலாகாதவரையில்...
கடலலையிற் கால் நனைக்கலாம், சுனாமியாகாதவரையில்...

வாழ்க்கையின் அவசியத்திற்காகப் பேணப்படும்
இத்தோல்வியின் ரகசியங்களுக்கும் எல்லை..,
வாழ்க்கைதான்...

பாராட்டு கீதம் அவர்களுக்கு...

[ஜானகி]

ரசிப்பதிலும் இவ்வளவு அழகா... ? அருமை ! இங்கு... அழுகையே...... அழகானதே....?

[ஆன்டனி ஜானி]

அக்கா ! தோல்வியின் ரகசியத்தை

அழகான கவிதை அமைத்து போட்டுவிட்டீங்களே !!!!!

அழகோ,அழகு வாழ்த்துக்கள் .......

[கௌதமன்]

உள்ளுக்குள் அழாமல்,
உடைந்து அழுது விடு;
அந்தக் கண்ணீருக்காவது
விடுதலை கொடு;
அழுகை தோல்விக்குறியல்ல;
அதுவே ஆயுதம்,
ஒருவகை வன்முறை;

[எஸ்.எம். சுனைத் ஹஸனீ]

கௌதம் சொன்னது சரியே. அழுகை தோல்வியல்ல. பயிரை வளர்க்கும் நீர் போல் உணர்வுகளை அழுகை முறுக்கேற்றும். கவிதைக்கு வாழ்த்துக்கள் கீதம்.