தூய தமிழில் ஒரு கவிதை...!

[கலைவேந்தன்]

மன்னித்தருள்வாயா தேவி...?


செருக்கெலாம் தகர்ந்ததுகாண் செந்தணலில் வீழ்ந்தனன்யான்
சுருக்கென்ற ஒருசொல்லால் சுகமனைத்தும் இழந்தனன்காண்
விருப்பின்றி வாழ்கின்றான் வினைதீர்க்கும் பாடறியான்
ஒருசொல்லால் ஒப்பற்ற சொர்க்கமும் சரிந்தது காண்...!

செந்தேளாய்க் கொட்டியவன் செந்தேனாய் இனியாவான்
நொந்தேதான் வாழ்கின்ற நோயாளி இவனறிவாய்
வெந்தேபோய் வீழ்கின்ற வெறும்வாழ்க்கை வாழ்கின்றான்
வந்திவனை நீகாத்து வரம் தருவாய் வாக்கரசி...!

மாயத்திரை யதனால் மக்கியது இவன் மனது
காயத்தால் புலம்புமிவன் கடுஞ்சொல் பொறுப்பாயோ
நேயத்தால் வந்ததென நெஞ்சம் நீ நெகிழ்வாயோ
போயவன் ஒழியட்டும் என்றவனை வெறுப்பாயோ?

திடமாக இவன்மனதைக் கட்டிடும் வழியறியான்
விடமாகப்பொழியும் வார்த்தைகளை மறந்திடுவாய்
முடமாகிப் போனவனுன் முகம்காணா ஏக்கத்தால்
சடமாக நிற்கின்றான் உன் பாதம் பணிகின்றான்...!

வலிபொறுக்கா இதயத்துடன் வாழ்க்கைதனைக் கடக்கின்றான்
கிலிகொண்டு மரணமதை என்னாளும் எதிர்நோக்கி
மெலிந்துபோன மனஉறுதி மெய்மறந்த ஏக்கமனம்
கலிநீங்கா கவலையுடன் உன்கழல் பணிகின்றான்...!

இனிமேலும் இவ்வாறு மனம்கிழித்து ரணமாக்கும்
கனிவில்லா சொற்களை கனவிலும் உதிர்த்திடான்
பனிபோன்ற் இன்சொல்லாள் ! நீபரிவுடன் மன்னிப்பாய்
உனில்தனைக் கரைத்துநின்று கால்பணிந்தான் அவன்ஏற்பாய்...!

கன்னித் தமிழால் கனிந்துன்னை வேண்டுகின்றான்
பின்னிப் பிணைந்தவனை மார்பனைத்து முகம்புதைத்து
முன்னிலும் பரிவாகத் தலைகலைத்து முத்தமிட்டு
மன்னித் தருள்வாயா மனமிரங்கி ஏற்பாயா...?

விரகத் தாபமில்லை வீணான ஐயமில்லை
இரவெலாம் முகம்புதைத்து இடைவிடா அழுகையினால்
வரவறியா வறியவன் போல் மனம்கலங்கிப் பேதலித்து
மரணம் தரும்வலி அவனுக்கிதனினும் கொடிதாமோ...?

தாயின்மேல் ஆணையாய் ஒன்றுசொல்வான் செவிதருவாய்
நாயினும் மேலான பாடுகள் பலபட்டும்
சேயொன்று முகம்பார்க்க தாயினுக் கேங்கிடும்
ஓயாத போராட்டம் உனைக்காண மட்டும் தான்..!

தன்னிலை விளக்கிவிட்டான் தன்னிதயம் திறந்துவைத்தான்
முன்னிலும் மேலதிகம் உனைக்காண விழைகின்றான்
அன்னவனில் நிறைந்து விட்ட தீக்குணங்கள் மன்னித்து
உன்னுடன் அணைப்பாயா உருகிநின்றான் கைகூப்பி...!

[சிவா.ஜி]

அருமை....மிக அருமை...

உங்கள் கவிதையில் சதிராடும் தமிழைப் படித்து பரவசமாகிறது. ஒவ்வொரு வார்த்தையிலும் தெறித்துவிழுகிறது சொல்ல வந்த கருத்து.

அன்னை சரஸ்வதியை, அள்ளி அனைத்து அரவணைப்பாயா என மன்றாடும் வரிகளில் தெரியும் சுத்திகரிக்கப்பட்ட உள்ளம் மனதில் பாரமேற்றுகிறது.

அற்புதமான கவிதை கலை. உங்கள் தமிழுக்கு நான் பரம ரசிகன். வாழ்த்துகள் நண்பா.

[இன்பக்கவி]

இப்படி எல்லாம் எழுத எல்லோராலும் முடியாது..
என்னால் முடியவே முடியாது...
தூய தமிழும் அருமை..
நான் ஓவ்வொரு வரியையும் இரண்டு, மூன்று முறை படித்தே புரிந்து கொண்டேன்.
நன்றிகள்

[mannar amuthan]

மிகவும் அருமை ஐயா... சொல்ல வார்த்தைகள் இல்லை.. வரி வரியாக பொங்குகிறது கவிதை

[இளசு]

உணர்வுப்பெருக்கும் தமிழ்ச்செருக்கும் ஒருங்கே அமைந்த மனம் மட்டுமே
இத்தகைய கவிதை வடிக்க வல்லது..

தேவியின் அருள் முழுதாய்க் கிட்டும் கலை..

வாழ்த்துகள்..


( மார்பணைத்து என வந்திருக்க வேண்டுமா????)

[கலைவேந்தன்]

சிவாஜி, இன்பக்கவி, மன்னார் அமுதன், இளசு... அனைவருக்கும் நன்றி நண்பர்களே..!

[வசீகரன்]

தமிழுக்கு அமுதென்று பேர்...
அந்த தமிழ் இன்ப தமிழ் எங்கள் உயிருக்கு நேர்...
உயிருக்கு நேர்...!

தூய தமிழில் கவி படி(டை)த்த ஆசிரியருக்கு..
என் மனமார்ந்த வணக்கத்தையும்.. நன்றியையும் தெரிவித்துகொள்கிறேன்..!

[govindh]

அருமையான கவி விருந்து படைத்திட்ட
கலை வேந்தன் அவர்களுக்கு மிக்க நன்றி...
பாராட்டுக்கள்.

[நாஞ்சில் த.க.ஜெய்]

தூய தமிழ் கவிதை மிக அருமை .இந்த கவியில் "கலிநீங்கா கவலையுடன் உன்கழல் பணிகின்றான்" இதில் "உனகழல்" எனும் வார்த்தைக்கு அர்த்தம் புரியவில்லை.இந்த கவிதையில் "சுருக்கென்ற ஒருசொல்லால் சுகமனைத்தும் இழந்தனன்காண்" இவரிகள் மிகவும் அருமை நானும் பலமுறை கண்டிருக்கிறேன் .ஆக இறுதியாக மனிதனின் செய்யும் தவறுகள் அனைத்தையும் கவிதை வடிவில் மிக அருமையாக தந்துளிளீர்.
உள்ளன்புடன்
த.க.ஜெய்

[Ravee]

கவி காளிதாசன் அன்னை சரஸ்வதியிடம் இப்படித்தான் வேண்டி இருப்பானோ ?






உன்னை அண்டி பணிவது என் வேலை
பணிந்த எனக்கு அருள்வது உன் வேலை
என் எண்ணத்தில் அள்ளித்தா ஆயிரம் ஆயிரம்
நான் தொடுத்து தருவேன் பா நூறாயிரம்

என்னையும் சிறிய முயற்சி செய்ய வைத்தது உங்கள் எழுத்தாற்றல் .

[கீதம்]

கவி காளிதாசன் அன்னை சரஸ்வதியிடம் இப்படித்தான் வேண்டி இருப்பானோ ?






உன்னை அண்டி பணிவது என் வேலை
பணிந்த எனக்கு அருள்வது உன் வேலை
என் எண்ணத்தில் அள்ளித்தா ஆயிரம் ஆயிரம்
நான் தொடுத்து தருவேன் பா நூறாயிரம்

என்னையும் சிறிய முயற்சி செய்ய வைத்தது உங்கள் எழுத்தாற்றல் .

படம் பிரமாதம் ரவி. இவள் எந்த நாட்டு கலைவாணியோ?

[கலைவேந்தன்]

தமிழுக்கு அமுதென்று பேர்...
அந்த தமிழ் இன்ப தமிழ் எங்கள் உயிருக்கு நேர்...
உயிருக்கு நேர்...!

தூய தமிழில் கவி படி(டை)த்த ஆசிரியருக்கு..
என் மனமார்ந்த வணக்கத்தையும்.. நன்றியையும் தெரிவித்துகொள்கிறேன்..!

மிக்க நன்றி வசீகரன்..!