பெண் வண்டுகள்- லேடி பேர்ட் பீட்டில்ஸ்
சில வாரங்களுக்கு முன் தென்றல் நம் மன்றத்திற்காகச் சுவரொட்டி வரைந்து இ-காசு பெற்றார் நினைவிருக்கிறது அல்லவா! இ-காசு கொடுத்தவர்கள் மறந்திருக்க மாட்டீர்கள். இ-காசு கொடுக்காத புத்திசாலிகள் சீக்கிரம் ஏமாறக்கடவது.
சரி அது அல்ல விசயம்! அப்பொழுது அதில் சில வண்டுகளையும் வரைந்திருந்தார். நான் அவற்றை மன்றத்தின் நிர்வாகக் குழுவோடு ஒப்பிட்டிருந்தேன். அவ்வண்டுகள் பயிர்களை அழிக்கும் பூச்சிகளை உண்டு பயிர்களைக் காக்கின்றன என்று. பென்ஸீம் சில விவரங்கள் கேட்டிருந்தார். அத்தகைய வண்டுகள் பற்றியும் பொதுவாக பூச்சிகள் பற்றியும் இப்பகுதியில் காண்போமா?
பொதுவாக தாவர வளர்ச்சிக்கு தடையாக உயிருள்ள(Biotic) மற்றும் உயிரற்ற (abiotic) காரணிகள் உள்ளன. உயிரற்ற வற்றில், தட்பவெப்பம், ஈரப்பதம், வறட்சி, களர் உவர் நிலத் தன்மை, மண்ணின் அமில-காரத் தன்மை போன்றன அடங்கும்.
உயிருள்ள தடைக்காரணிகளுல் பூச்சிகள் (Insect Pests), பூஞ்சை, பாக்டீரியா போன்ற நோய்க்கிருமிகள் (Pathogens), எலி, குருவி போன்ற விலங்குகள், மைட்ஸ் (Mites) எனப்படும் மற்ற உயிரினங்கள் அடங்கும். இத்தடைக்காரணிகள் அனைத்துமே அந்தந்த சூழ்நிலைக்குத்தக்க காணப்படும். கனடா போன்ற குளிர்நாடுகளில் பூச்சிகளால் விவசாயத்திற்கு ஏற்படும் நஷ்டம், இந்தியா போன்ற வெதுப்புநாடுகளை விடக் குறைவுதான். ஆனால் கனடாவில் நோய்க்கிருமிகளின் தாக்கம் இந்தியாவை விட அதிகம்.
சரி விஷயத்திற்கு வருவோம். பூச்சிகள் வெவ்வேறு பருவ நிலைகளில் வளர்ச்சி அடைவதால் அவற்றால் ஒவ்வொரு பருவத்திலும் ஒரு உணவு வகையை உண்ண முடியும். சிறுவயதில் படித்திருப்போமே, முட்டை- புழு- கூட்டுப்புழு- வளர்ச்சிபெற்ற பூச்சி என பூச்சியினங்கள் பல வளர்ச்சி நிலைகளை அடைகின்றன என்று. இதில் புழுப்பருவம்தான் தாவரங்களை அழிக்கும் பருவம். அழகாக பறக்கும் வண்ணத்துப் பூச்சி, தான் புழுவாக இருக்கும் பொழுது தாவரங்களை அழித்துத்தான் வளர்கிறது. பயிர்களுக்கு அதிகம் சேதம் விளைவிக்கும் Order( தமிழில் பெருங்குடும்பம் எனச் சொல்லலாமா?) வண்ணத்துப் பூச்சியின் Lepidoptera (லெப்பிடாப்டீரா) தான்.
பூச்சியினங்களின் வகைப்பாட்டியல் (Taxonomy) சுவாரசியமாக இருக்கும். பூச்சியினங்களின் Orderகளின் பெயர் அவற்றின் இறக்கை அமைப்பை வைத்தே இருக்கும். “ptera” – என்றால் கிரேக்க மொழியில் இறகு என்று பொருள். “Lepido” என்றால் “செதில்” என்று பொருள். வண்ணத்துப் பூச்சியின் இறகுகளை உற்றுக் கவனித்தால் அந்த வண்ணப் பூச்சுகள் எல்லாம் செதில்கள் என்பது புரியும்.அதே போல நமது வீட்டில் இருக்கும் ஈ, இரண்டு இறகுகள் மட்டும் உள்ளதால் Diptera (Di- இரண்டு). தேனீக்கள் Hymenoptera எனப்படும் வேறு order (Hymen- தோல்). மே ஃபிளைஸ் –Mayflies, Ephemroptera எனப்படும் order(Ephemeros- குறுகிய ஆயுள்; Ephemeralன் எதிர்ப்பதம் Eternal(நீண்ட).
நமது கதாநாயகி பெண்வண்டு Coleoptera எனப்படும் பெருங்குடும்பத்தைச் சார்ந்தவள். Coleo என்றால் மூடப்பட்ட என்று பொருள். நன்கு கவனித்துப் பாருங்கள் பெண்வண்டுகளின் கடினமான இறகுகளின் கீழ் மெல்லிய இறக்கைகளும் காணப்படும். இந்தப் பெருங்குடும்பத்தில் உள்ள சிற்றினங்களின் (Species) எண்ணிக்கை தெரியுமா? அதிகமில்லை 350,000 தான். இன்னமும் புதிது புதிதாகக் கண்டுபிடித்துக் கொண்டே இருக்கிறார்கள். இந்தப் பெருங்குடும்பத்தைச் சேர்ந்த பூச்சிகளை பீட்டில்(beetles) என்றுதான் அழைக்க வேண்டும். Bug –பக் எனப்படுபவை, Hemiptera எனப்படும் வேறு பெருங்குடும்பத்தைச் சார்ந்தவை.
இந்தப் பெருங்குடும்பத்தில் நல்லவர்களும் உண்டு தீயவர்களும் உண்டு. ஆனால் நமக்கு கதாநாயகி ஆன பெண்வண்டு நல்லவள். பெண்வண்டுகள் புழுப்பருவத்தில் பயிர்களின் சாறு உறிஞ்சும் அசுவினிப் பூச்சிகளை அப்படியே சாப்பிடும். பெண்வண்டுகள் அனைத்துமே மாமிசப் பட்சினிகள்தான். அதனால்தான் அவை தாவரத்தை உண்பதில்லை. அதிலும் யாரோ சிலர் காதல் மணம் புரிந்து கொண்ட அசைவாள் வேறு ஆகிவிட்டனர் (Colarodo potato beetle, Mexican bean beetle).
பெண்வண்டுகள் நிறைய முட்டையிடும். பெண்வண்டுகளின் முட்டைகள் நேர்த்தியாக இடப்பட்டு சூரியஒளியினால் பொறிக்கப் படும்.
குஞ்சுகள் அசுவினிப் பூச்சிகள், மாவுப்பூச்சிகள், தத்துப்பூச்சிகள், போன்ற சாறுண்ணிகளை மட்டுமே சாப்பிடுவேன் என அடம்பிடிக்கும்.
அசுவினிப் பூச்சியை உண்ணும் பெண்வண்டின் புழு
பெண்வண்டு புழுவிடம் மாட்டிக் கொண்ட ஈ.
பின்னர் கூட்டுப் புழு பருவத்தில் மோன நிலையெய்தி, முழு வளர்ச்சி பெற்ற பெண்வண்டாக வெளிவந்து மறுபடியும் சில பல பூச்சிகளை உள்ளே தள்ளிவிட்டு தன் பரம்பரையை நிலை நாட்ட முட்டைகளை இட்டு மடிந்து விடும்.
கூட்டுப்புழுவில் இருந்து வெளிவரும் வளர்ச்சி பெற்ற பெண்வண்டு
வளர்ந்த நிலையில் உள்ள பெண்வண்டு அசுவினிப் பூச்சியை அப்படியே சாப்பிடும் காட்சி.
ஆனால் பூச்சிக்கொல்லி மருந்து தெளிப்பினால், குறிப்பிட்ட அளவிற்கு மேல் போகும்பொழுது, நன்மை தரக்கூடிய பெண்வண்டுகளும் அழிந்து போகின்றன. இது நேரடி விளைவு என்றால் மறைமுக விளைவானது பெண்வண்டுகளின் உணவுப் பற்றாக்குறையால் வருவது. பெண்வண்டுகளின் உணவான மற்ற பூச்சிகள், பூச்சிக் கொல்லியால் அழிந்து போவதால் பெண்வண்டுகளுக்கு உணவு கிடைப்பதில்லை. பயிர்களைப் பூஞ்சைகள் அழிப்பது போல இந்தப் பெண்வண்டுகளையும் பூஞ்சைகள் தாக்குகின்றன. இதனால் தான் நன்மைதரக்கூடிய பூச்சிகள் எண்ணிக்கை குறைவாகக் காணப்படுகின்றது.
சில சுவாரஸ்யமான தகவல்கள்:
பூச்சிகளைப் பற்றிப் படிப்பதற்கு Entomology என்று பெயர். Entomo- என்றால் வெட்டப்பட்ட உடலமைப்பு கொண்ட (பூச்சிகள் அவ்வாறு இருப்பதால்)- Logy என்றால் கற்றல்.
பூச்சிகள் Hexapoda (Hexa- ஆறு; Poda- கால்கள்) என்ற Phylum- ஃபைலத்தைச் சார்ந்தன. ஆறுகால்கள் கொண்டால் மட்டுமே அது பூச்சி. அதனால்தான் சிலந்திக்கு எட்டுக்கால் பூச்சி என்ற பெயர். சிலந்தி பூச்சியினத்தைச் சார்ந்தது அல்ல.
நன்மை செய்யும் சில பெண்வண்டு இனங்கள்- ஆசியாவில் இருந்து அமெரிக்காவிற்கு இறக்குமதி செய்யப்பட்டன.
1999ம் ஆண்டு NASA வால் விண்வெளிக்கு 4 பெண்வண்டுகள் எடுத்துச் செல்லப்பட்டன. அவை புவியீர்ப்பு விசையில்லாத நிலையிலும் அசுவினிப்பூச்சிகளை அழிக்கின்றனவா என்று சோதனையிட.
பெண்வண்டுகளும்- பொன்வண்டுகளும் (jewelbeetle) ஒன்றல்ல.
பூச்சிகளின் உடம்பில் இரத்தச் சுற்று மண்டலம் எனத் தனியாக இல்லை. பூச்சிகளின் இரத்தத்தில் சிவப்பு நிறக்காரணியான ஹீமோகுளோபின் (Haemoglobin) இல்லை. ஆனால் பூச்சிகளுக்கும் இரத்தம் உண்டு.
Cicadas எனப்படும் சில்வண்டுகளில் ஆண் வண்டுகள் மட்டுமே சத்தமிடும். உலகிலேயே அமைதியான எதிர்த்துப் பேசாத மனைவியரைக் கொண்ட ஒரே விலங்கு சில்வண்டாகத்தான் இருக்க முடியும்.
சிறுவயதில் பிடித்து விளையாடுவோமே தட்டான் பூச்சிகள் அவை நீரில்தான் முட்டையிடும். அந்தப் பூச்சிகளின் புழுக்கள் நீரில் உள்ள கொசுக்களின் புழுக்களை அழித்து விடும்.
உங்களைக் கடிக்கும் கொசு பெண் கொசுதான். ஆண் கொசுவால், பாவம் கடிக்க முடியாது.
Reply With Quote
Originally Posted by mukilan
Bookmarks