கவிச்சமர் - களம்

[அமரன்]

நெளிவு சுழிவுகள் அலங்கரித்த
கரிநிறச் சித்திரக்கதை
வண்ணம் பூசிக்கொண்டது
தங்கையின் வார்த்தைகளால் ..

[kampan]

வார்த்தைகளால் கோப்பது கவிதை
கவிதைகளால் கோப்பது கற்பனை

[நம்பிகோபாலன்]

கற்பனையில்
கவிதையாம்
யாரங்கே
என்னவளை பார்த்து
ஒருமுறை சொல்லுங்கள்
கவிதை கற்பனையில்
வருவதா
இல்லை காதலியால்
வருவதா என்று.

[அமரன்]

கற்பனையால் வருவதா
காதலியால் வருவதா என்று தேடும்
சூழ்நிலை சூட்டில்
உதடுடைத்து வெளிவந்த
சொற்குஞ்சுக் கூட்டங்களும்
கவிதைகளாகின்றன..

இரை தேடி அவை
இதயத்தில் கொத்தினாலும்
இதம் பிறக்கிறது
கவிதையாக..

[அக்னி]

கவிதையாக
வாழ்க்கை இருக்கும்
என்றுதான் நினைத்தேன்...
கவிதைக்குப் பொய்யழகு
என்பது
இப்போது புரிகின்றது...

[மதி]

இப்போது புரிகின்றது
கண்கள் சிமிட்டுவதின்
ரகசியம்
மனத்திரையில் பிம்பமாய்
என்றும் உன் நிழல்படம்

[அக்னி]

நிழல்படம் சொல்லுமா,
பாட்டியாகக் கதைகள்..?
நிழல்படம் ஏந்துமா,
தாத்தாவாகத் தோள்களில்..?
நாடு பிரித்த உறவுகள்,
நிழல்படங்களில்
இணைக்கப்படுகின்ற போதிலும்,
இழக்கப்படுகின்றன,
நிஜ ஸ்பரிசங்கள்...

[அமரன்]

நிஜ ஸ்பரிசங்களை
பரிசளிக்கின்றன
செல்லரித்த புகைப்படங்கள்
தடவுகையில்.

[அக்னி]

தடவுகையில்,
உருவத்தைத் காட்டாத,
புகைப்படங்கள்..,
உள்ளத்தில்
உருவங்களை
ஆரத் தழுவுகின்றன...

[அமரன்]

ஆரத் தழுவுகின்றன
மறு பிறவி
எடுத்த உறவுகள்
வாக்குச் சாவடிகளில்..

[அக்னி]

வாக்குச் சாவடிகளில்,
வடிகட்டப்பட்டுச்
சிம்மாசனமேற்றப்படுகின்றனர்,
நாட்டைச்
சாகடிக்கப் போகின்றவர்கள்...

[மதுரை மைந்தன்]

வாக்குச் சாவடிகளில் வேட்டுகள்
இறைந்து கிடந்தன சீட்டுகள்
அனைத்தும் செல்லா வோட்டுகள்

வாக்குச் சாவடிகளில் கூட்டங்கள்
அவர் முகங்களில் வாட்டங்கள்
என்று நிற்கும் ஏழைகளின் ஓட்டங்கள்

வாக்குச் சாவடிகளில் காவல்
மக்களின் பாதுகாப்பு பற்றி ஆவல்
செய்ய வேண்டியது அவர்களின் ஏவல்