கவிச்சமர் - களம்

[jaffy]

வேண்டுமென வேண்டிய அனைத்தும்
வேண்டியவன் பெற்றதில்லை
வேண்டியவன் பெற்றதெல்லாம்
வேண்டியவையாக இல்லை
வேண்டியவையான அனைத்தும்
வேண்டியவன் கேடகவில்லை
வேண்டியவன் கேட்டதெல்லாம்
வேண்டியனவாக இல்லை
வேண்டுமென்று வேண்டுமென்று
வேண்டியவன் வேண்டியது
வேண்டியதா என்பதையே
வேண்டியவன் உணரவில்லை
வேண்டியவன் வேண்டியதை உணராது வேண்டும் போது
வேண்டுதல் வேண்டாமை இலான் அடியில்
வேண்டுதலாய் செல்வதில்லை

[தாமரை]

செல்வதில்லை என்று
உறுதியுடன் இருந்த கால்கள்

வருவதில்லை என
விலகிச் சென்ற பிறகும்

கண்கள் இங்கேயே பார்த்துக்கொண்டிருக்கின்றன

[jaffy]

இங்கேயே பார்த்தேத்தான் இருக்கின்றன கண்கள்
இங்கேயே பூத்தேத்த்தான் இருக்கின்றன நினைவுகள்
இங்கேயே ஒரு காவல் நாய் போல
படுத்தேத்தேன் இருக்கிறது நெஞ்சம்
எங்கே இல்லாத போதும்
இங்கே இல்லாமல் போவது இல்லை
இங்கே இல்லாமல் போனதும் இல்லை

[தாமரை]

இல்லயென்று உன் தலை
அசைந்தாடுகின்ற போது
உன் காது வளையங்கள்
ஆமாமெனச் சொல்லிச்
சிரிக்கின்றன!

[சிவா.ஜி]

சிரிக்கின்றன சில கசப்பான உண்மைகள்
சமூக வீதியில் சிதறிகிடக்கும் அவலங்களைப் பார்த்து,
பொய்களின் பேயாட்டம்...நியாயங்களின் தள்ளாட்டம்
இருந்தும் இன்னமும் மழை பெய்கிறது சரியாய் வாழும் சிலரால்...!

[தாமரை]

சிலரால் பேசப்படும் தர்மங்கள்
சிலரால் செய்யப்படும் தியாகங்கள்
சிலரால் எண்ணப்படும் நன்றிகள்
சிலரால் உணரப்படும் அன்புகள்
சிலவாக இருந்தாலே சிறப்பு!

[ஓவியன்]

சிறப்பு சிறகு விரிக்கையில்
தொலைந்து போவது,
உழைப்பும் விலையும்
மட்டுமல்ல,
அந்த சிறப்பின் திறப்பும் கூட...!!

[jaffy]

சிறப்பு மிக்க
அத்தனை மேன்மைகளாலும் அமைந்தது
உன் ஆசனம்
சிறப்பு மிக்க
அத்தனை தூய்மைகளாலும் வடிவமைக்கப்பட்டது
உன் ஆடை
சிறப்பு மிக்க
அனைத்து நறுமணங்களும் கமழ்வது
உன் பெயர்
சிறப்பு மிக்க
அனைத்து ஆபரணங்களிலும் மிளிர்வது
உன் அழகு
சிறப்பு மிக்க
அனைத்து நேசத்திலும் தெரிவது
உன் கண்கள்
சிறப்பு மிக்க
அனைத்து கருணைகளிலும் காண்பது
உன் கைகள்
சிறப்பு மிக்க
அனைத்து புலவர்களாலும் நிகழ்ந்தது
உன் வளர்ப்பு
சிறப்பு மிக்க
அனைத்து மாமன்னர்களாலும் விரிந்தது
உன் பரப்பு
சிறப்பு மிக்க
அனைத்து நூல்களாலும் உண்டானது
உன் செழிப்பு
நீ ஒரு காந்தபுலம்
நீ ஒரு ஆள்கடத்தி
நீ ஒரு ரசவாதம்
நீ ஒரு மாயநீலம்
ஒரு சூனியக்காரியின்
அத்தனை மந்திரங்களும் கட்டப்பட்டது
உன் நிலத்தின் சுவர்

[தாமரை]

சுவர்
சாய்ந்து அழும்பொழுது தோழன்
பெயரை கிறுக்கிய போது கோட்டை
கிரிக்கெட்டிற்கு ஸ்டம்ப்

பல நேரங்களில்
பெரியவர்களுக்கு
அதனருமை தெரிவதே இல்லை..

அதற்கும் எனக்கும்
இப்போது ஒரே பெயர்

[ஆதவா]

சுவர்
சாய்ந்து அழும்பொழுது தோழன்
பெயரை கிறுக்கிய போது கோட்டை
கிரிக்கெட்டிற்கு ஸ்டம்ப்

பல நேரங்களில்
பெரியவர்களுக்கு
அதனருமை தெரிவதே இல்லை..

அதற்கும் எனக்கும்
இப்போது ஒரே பெயர்

பெயர் என்பது எதனைக் குறிக்கிறது?
என்னை? என் உடலை? என் உயிரை?
என் ஆளுமையை?
எனக்கு நீ விதித்த மதிப்பை?
(ஆனால்
ஒருபோதும்
பெயர் பெயரை மட்டுமே குறிக்கிறது
என்று சொல்லாதே
போலியாக இருந்துவிடும் பதில்)
பெயர் என்பது உடையைப் போன்றது
என் நிர்வாணத்தை மறைக்கும்
சொல்லாடை.
அது உடலுக்கு உடல்
மாறிக் கொண்டேயிருக்கிறது
அல்லது
பெயருக்குப் பெயர்
மாறிக் கொண்டேயிருக்கிறது உடல்
பெயர் என்பது எதனையும் குறிப்பதில்லை
என்னையுமில்லை,
என்னுடலையுமில்லை
அது ஒருபோதும்
ஆடையின் இறுக்கமாக இருப்பதில்லை
பெயர் என்பது
பெயரையும் குறிப்பதில்லை.

[சிவா.ஜி]

குறிப்பதில்லை வரலாறு
சாமான்யனின் தோல்விகளையும் வெற்றிகளையும்
தொடர் வெற்றிகளும் ஒரு சமயம் மறக்கப்படுகின்றன
தொடர் தோல்விகள் மறைக்கப்படுகின்றன
குட்டிச்சுவர் இடிந்தால் சம்பவம்
கோட்டை இடிந்தால் சரித்திரம்
கோட்டையாய் இருப்போம்
இடிந்தாலும் வரலாறாய் வாழுவோம்...!!!

[ஆதவா]

குறிப்பதில்லை வரலாறு
சாமான்யனின் தோல்விகளையும் வெற்றிகளையும்
தொடர் வெற்றிகளும் ஒரு சமயம் மறக்கப்படுகின்றன
தொடர் தோல்விகள் மறைக்கப்படுகின்றன
குட்டிச்சுவர் இடிந்தால் சம்பவம்
கோட்டை இடிந்தால் சரித்திரம்
கோட்டையாய் இருப்போம்
இடிந்தாலும் வரலாறாய் வாழுவோம்...!!!

வாழ்வோமென்ற சொல்
அந்த ஒற்றைச் சொல்லுக்காகத்தான்
நீ பிளந்து நிற்கும் மார்பில்
குடியிருக்கிறேன்.
உன் கடுஞ்சீற்றத்திற்கெல்லாம்
பயப்படாதிருக்கிறேன்.
நீ ரெளத்திரத்துடன் எறியும் நெருப்பை
என் மார்போடு தழுவிக் கொள்கிறேன்.
கோபக் கனலின் நடுக்கத்தில்
உன் கூந்தலையே பற்றிக் கொள்கிறேன்
ஆசுவாசப்படுத்திக் கொள்ள
கொஞ்சம் அவகாசம் கொடு
இன்னொரு சொல்லுக்காகவும்
காத்திருக்கிறேன்.