ரோ(ல்)(தனை) மாடல்..!

[அக்னி]

உன் வளர்ச்சி
அபாரம்...
எங்களுக்குத்தான்
பாரம்...

உன் வளர்ச்சியைப்
பார்க்கப் பார்க்க
வயிறு எரிகிறது...

எரிச்சலில்
உன்னை எரித்தாலும்,
எரிந்துகொண்டே
ஏறிப்போகின்றாய்...

எரிப்பதும் நீதான்...
எரிவதும் நீதான்...
எரிய வைப்பதும் நீதான்...

வளர்ச்சிக்கு
ரோல் மாடல்..,
என்றால்,
அது நீயேதான்...
வளர்ச்சியால்
ரோதனை மாடல்..,
என்றாலும்,
அதுவும் நீயேதான்...

நீ...
பெட்ரோல்..!

[பூமகள்]

நீ
எரிச்சலும்
எரிதலும்
செய்து
விலையேறியதால்..

குளுமையிலும்
கண்டுவிட்டோம்..
எரிசக்தி...

ஆமாம்..
நீராதாரத்தில்
மகிழுந்து..
எண்பது கி.மீ
வேகமாம்..

இனி
பெட்ரோல்
உன் ரோல்
சுழியம்..!!

அழகான கவிதை..!!
அடிக்கடி எழுதுங்க 'தல'... அப்பத்தான் இங்க மூளை வேலை செய்யுது...!!

பாராட்டுகள் அக்னி அண்ணா.

[அக்னி]

நீர் மகிழுந்து...
மகிழ்ச்சி உந்துகிறது... (நன்றி: பாரதி அண்ணா)

வெளிவரட்டும் பார்ப்போம்...

விலையின் பின்னே
சுழியம் அதிகரிக்காதவரை,
நன்று நீரில் மகிழுந்து...

அதிகரித்தால்,
கானல்நீரில் மகிழுந்து...

நீர் வாங்கலாம்...
மகிழுந்து வாங்கலாமோ...
நாம் வாங்கலாமோ...

அழகிய அர்த்தம் பொதிந்த பின்னூடத்திற்கு நன்றி பூமகள்...

[பூமகள்]

கலக்கிட்டீங்க போங்க..!!

விலையில்
பின் வரும் சுழியங்கள்
தீர்மானிக்கும் நம்
கைகடியளவு..!!

அப்போது வீட்டுக்கு வீடு..
குழாயில் பெட்ரோல் வருமோ
நீருக்கு பதில்...??!!

நன்றிகள் அக்னி அண்ணா..
அறிவுப் பின்னூட்டத்தை நன்கு ரசித்தேன்..!

[அக்னி]

நீரா காரா பார்ப்போம் அப்புறம்...

எரிபொருள் விலையேற்றம்...

நீராக ரம் குடிப்போரே அடைகின்றனராம் சேதாரம்...

நீராகாரம் மட்டுமே கொள்வோர் வாழ்வாதாரமோ,
பெரும் போராட்டம்... கடும் திண்டாட்டம்...

ஆதாயம் தேடுவது யாரோ...
ஆயம் போடுவது யாரோ...
ஆம் போட்டே ஆகவேண்டும் நாம்...
வேறு வழி...?

கச்சா எண்ணெய் விலையேற்றம்...
கச்சை வரைக்கும் பெரும்தாக்கம்...

[இளசு]

அக்னி பெட்ரோல் ஊற்ற
பூ மலர்ந்த விந்தை!

இரசித்தேன் கவிச்சமர் விள்ளலை..!

[நம்பிகோபாலன்]

அருமையான கவிதை...

இன்றைய சூழலில்
பற்றாமலே பற்றி எகிறுது பெட்ரோலின் விலை..

[கண்மணி]

பெட் - ரோலை -செல்லப் பாத்திரத்தை
பேட் - ரோலாக்கிய =வில்லப் பாத்திரமாக்கிய
அக்னியே
பற்ற வைப்பதும் நீர்தான்
எரிவதும் நீர்தான்

நீர்த்துப் போன நீர்தானே
பெட்ரோலும்
பேட்ரோலும்!

(பல்லாயிரக்கணக்கான ஆண்டுகளுக்கு புதைப்பட்ட உயிரிகள்தான் எண்ணையாயின..)

[சிவா.ஜி]

ரோல்மாடல்...இப்படி எகிடு தகிடாக உயர்ந்தால் ரோதனை மாடலாகிவிடுகிறது. அக்னியின் வித்தியாசப்பார்வை அழகாக இருக்கிறது. வாழ்த்துகள் பிரிச்சி மேயும் புலியாரே.

[mukilan]

அருமையாகச் சொற்களைக் கையாடத்தெரிந்த அக்னி!
புலம்பெயர் வாழ்வின் சோகம் தாங்கிய எஃகு நீ!
தலையாய பிரச்சினை ஒன்றினை குறித்த தெளிவான கவிதை! எளிதாக இருந்தாலும் சொற்களை மாலையாகக் கட்டும் வித்தை தெரிந்திருக்கிறீர்கள்.

ஒருமையில் விளிப்பதற்கு மன்னிக்கவும், விளிப்பு எத்தகையதானதாக இருந்தாலும் அன்பை மட்டுமே குறிக்குமென்பதால்.

[அனுராகவன்]

நன்றிகள் அக்னி,மகள்!!

[ஆதவா]

உன் வளர்ச்சி
அபாரம்...
எங்களுக்குத்தான்
பாரம்...

எனக்கு இந்தக் கவிதையில் உடன்பாடில்லை நண்பா! (மன்னிக்கவும். இது என் கருத்து மட்டுமே!)

பெட்ரோல் வளர்ச்சியடைகிறதா? இல்லை குறைகிறதா? பல்லாயிரக்கணக்கான வருடங்களுக்கு முந்தி பல உயிர்களும் மரங்களும் புதையுண்டு உருவானதுதானே பெட்ரோல்.. அதன் அளவு எடுக்க எடுக்க குறையுமா கூடுமா? (இதைப்பற்றி யாரேனும் சொல்லுங்கள்..)

எரிச்சலில்
உன்னை எரித்தால்....

பெட்ரோலை எரிச்சலோடு பயன்படுத்துகிறீர்களா? அப்படியென்றால் ஏன் பயன்படுத்தவேண்டும். பயன்படுத்தாதீர்கள்.. சேவ் ஆயில் சேவ் இண்டியா.

எரிப்பதும் நீதான்...
எரிவதும் நீதான்...
எரிய வைப்பதும் நீதான்...

எரிப்பது மனிதன், எரிவது பெட்ரோல், எரிய வைப்பதும் (?) மனிதன்

பெட்ரோலைத் தோண்டியெடுத்து நாட்டுக்கு நாடு பகிர்ந்து இயற்கையைக் கொள்ளையடித்த நாடுகளையோ மனிதர்களையோ குறை சொல்லாமல் எப்போதோ புதைந்த இயற்கையைப் பழிப்பது நியாயமா அக்னி?

பெட்ரோலியம் பொருட்கள் இல்லாமல் போனால் எத்தனையோ பாதிப்புகள் ஏற்பட வாய்ப்புண்டு.

(கண்ணுவின் பின்னூட்டம் சொல்வது ஆயிரம். )