குருவிகளுடன் பறக்கலானது மனது...

[யவனிகா]

கண்கள் குளிர்ந்தன...
கண்ணாடியூடே தெரிந்த
பரந்து விரிந்த இளமஞ்சள் வானம்,
பச்சைச்செடியில் தீக்கங்குகளாய்
அடர்சிவப்பு செம்பருத்திப்பூக்கள்.....
செம்பருத்தியைக் கொத்தியவாறு
சிட்டுக் குருவிக் கூட்டம் ஒன்று...

ஏதோ வாகனம் எழுப்பிய இரைச்சலில்
எழும்பிப் பறந்தன அச்சமுற்ற
சிட்டுக்குருவிகள் வேலியின்றும் வேகமாய்...

கவிதை எழுத சரியான தருணம்
சொன்னது மனம்...

பேப்பரும் பேனாவும் எடுத்த நிமிடம்
கவிதைக்குச் சிக்காமல்
தப்பிப் பறந்திருந்தன குருவிகள்...

எல்லாவற்றையும் வளைத்துப் பிடித்து
வார்த்தையில் அடைத்தல் சாத்தியமா?

எழுதுவதை நிறுத்தி விட்டு
குருவிகளுடன் பறக்கலானது மனது...

குருவிகள் பறக்கட்டும்
கவிதையில் சிறைப்பட வேண்டாம்...

குருவியின் பின்னால்
மிதந்து செல்லும் மனதே...

நீயும் தப்ப முயற்சி செய்...
என் கவிதையிடமிருந்து...

[நாகரா]

குருவிகளைச் சிறைப்படுத்தாமல்
கவிதையே குருவிகளோடு பறக்க
நானும் பறக்கிறேன்.

அருமையான் கவிதை, வாழ்த்துக்கள் யவனிகா.

[சுட்டிபையன்]

குருவியின் பின்னால்
மிதந்து செல்லும் மனதே...

நீயும் தப்ப முயற்சி செய்...
என் கவிதையிடமிருந்து...

அழகான கவிதை
எதிலும் மாட்டாமல் தப்பக் கூடிய மன்மிருந்தால் மனிதன் எப்போதோ மனிதனாகி இருந்திருப்பான்

[மதி]

கட்டுக்குள் சிக்காமல் பறக்க மனதால் மட்டுமே முடியும்.. அதை கட்டுபடுத்துதல் கடினம். கவிதையால் கூட..
நல்ல கவிதை யவனி அக்கா..

[பூமகள்]

குருவிக்கான கவிதை
குருவியுடனே பறந்ததுவே..!!

சிக்காத மனமும்
பின்னால் போனதோ??!!

கட்டுக்குள் அடங்கா கற்பனை
விட்டுச் சிறகடித்தனவோ??

சூப்பர் யவனி அக்கா..!!
காட்சிகளைக் கூட கவிதையில் சொல்லி நச் என்று ஒரு கருவோடு முடிப்பது உங்களுக்கே உரிய தனித்திறன்..!!

அசத்துங்க அக்கா..!!
உங்கள் தங்கையானதில் பெருமிதம் கொள்கிறேன்.!

[சிவா.ஜி]

கவிதைக்குள் கட்டுண்டு கிடக்காமல் குருவியுடன் சிறகடித்து பறந்து வா மனமே என மனதை பறக்கவிட்டு....ஏற்கனவே குருவிகளைப் பார்த்த கண்கள் கவர்ந்து வைத்த வார்த்தைகளால் கவிதை வந்து விழுந்திருக்கிறது.

மனதைக் கட்ட யாரால் முடியும்....காற்றோடும் கூட்டு சேரும்...குருவியோடும்..பறந்து திரியும்...அலையோடும் விளையாடும்....அண்டங்களைத் தாண்டியும் சென்று வரும்...

அழகான கவிதைக்கு வாழ்த்துகள் தங்கையே.

[செந்தமிழரசி]

வானளந்த குருவியிறகும்
வார்த்தையளந்த மனது
கவிதைக்கும் தப்பிக்க
காட்சி தப்பாமல் கண்களில்.

வாழ்த்துக்கள் யவனிக்கா

[rocky]

அன்புள்ள மன்றத்தோழி யவனிகா அவர்களுக்கு,

வரிகள் (கவிதை) மிகவும் அருமையாக இருந்தது. உண்மையிலேயே மிகவும் அருமையான கருத்தை அழகாகச் சொல்லியிருக்கிறீர்கள். நானும் கவிதை என்ற பெயரில் கிறுக்க ஆரம்பித்ததிலிருந்து எதைக் கண்டாலும் இதை ஒரு கவிதையாக எழுதலாமா என்ற எண்ணம் பார்ப்பதிலெல்லாம் தோன்றிக்கொண்டிருந்தது. ஆனால் கொஞ்சம் யோசித்த பிறகே தெரிந்தது, நான் செய்து கொண்டிருந்த தவறு,

பார்த்த அழகைக் கவிதையாக்க
அறிவு சென்றுவிட்டது, இப்போது
பாதி மட்டுமே ரசித்த மனதால்
கவிதையும் கெட்டது,
காட்சியும் போய்விட்டது.

இந்தக் கருத்தை ஒரு நல்ல பெரிய கவிதையாக எழுத முயற்சித்துக் கொண்டிருந்தேன் ( ரொம்பநாளா). ஆனால் அதே விஷயத்தைத் தாங்கள் மிகவும் அருமையாகச் சொல்லிவிட்டீர்கள். கவிதை எழுதுவோர் அனைவருக்குமே இந்தப் பிரச்சனை இருக்குமென்றே நிணைக்கிறேன். இதனால் அழகை மட்டும்மல்ல பல உணர்ச்சிகளையும் கவிஞர்கள் அந்த நொடியில் கவிதையாக்க முயன்று வாத்தைக்ளைத்தேடி சென்றுவிட்டு அனுபவிப்பதை இழந்துவிடுகின்றனர். ஆனால் ஒரு நிகழ்வை முழுமையாக அனுபவித்து உணர்ந்த பின்னர் தானாக உதிக்கும் கவிதைகளுக்கு இணையாக நாம் தேடிப்பிடித்து ஒட்டவைக்கும் வார்த்தைகள் இருப்பதில்லை. மிகவும் அருமையான வரிகள், நன்றி.

[ஷீ-நிசி]

பேப்பரும் பேனாவும் எடுத்த நிமிடம்
கவிதைக்குச் சிக்காமல்
தப்பிப் பறந்திருந்தன குருவிகள்...

எல்லாவற்றையும் வளைத்துப் பிடித்து
வார்த்தையில் அடைத்தல் சாத்தியமா?

எழுதுவதை நிறுத்தி விட்டு
குருவிகளுடன் பறக்கலானது மனது...

குருவிகள் பறக்கட்டும்
கவிதையில் சிறைப்பட வேண்டாம்...

குருவியின் பின்னால்
மிதந்து செல்லும் மனதே...

நீயும் தப்ப முயற்சி செய்...
என் கவிதையிடமிருந்து...

படிக்கையில் இந்த வரிகளினுடன் ஒன்றிப்போனது மனது!

வாழ்த்துக்கள் யவனி!

[இளசு]

விட்டு விடுதலையாகு - அந்தச்
சிட்டுக் குருவியைப்போல்...


எங்கெங்கோ அறியாத் தளங்களில் மனதை அலையவிடும் கவிதை!

நான் கனவு காண்பதாகக் கனவு காண்கிறேன் - இது சர்ரியலிசம் என்பார்கள்..

கவிதையிலிருந்து தப்பச் சொல்லி, குருவிகளை வைத்து கவிதை பாடுவது --
குருவிகளுடன் மனதை படிமமாக்கும் இதமான உத்தி..

கொன்றைப்பூக்களுக்குப் படித்த தீக்கங்கு வர்ணனை இங்கே செம்பருத்திக்காய்..

வாழ்த்துகிறேன் யவனி..
உன் கவியுலகில் இது புதுப் பரிமாண பவனி..

[யவனிகா]

பார்த்த அழகைக் கவிதையாக்க
அறிவு சென்றுவிட்டது, இப்போது
பாதி மட்டுமே ரசித்த மனதால்
கவிதையும் கெட்டது,
காட்சியும் போய்விட்டது.

மிக மிகச் சரியாக நாடி பிடித்துவிட்டீர்கள்...ராக்கி. நன்றி.

[யவனிகா]

விட்டு விடுதலையாகு - அந்தச்
சிட்டுக் குருவியைப்போல்...
கொன்றைப்பூக்களுக்குப் படித்த தீக்கங்கு வர்ணனை இங்கே செம்பருத்திக்காய்..
வாழ்த்துகிறேன் யவனி..
உன் கவியுலகில் இது புதுப் பரிமாண பவனி..

அண்ணா...நிஜமாகவே இந்த கொன்றைப் பூவை நீங்கள் சொல்வீர்கள் என்று, செம்பருத்திப் பூவைப் பற்றி எழுதும் போது தயங்கி ஒரு விநாடி நின்றேன். ஆனாலும் ஏனோ இந்த உவமையை விட மனம் இல்லை. சிவப்பு நிறப் பூக்களைப் பார்க்கும் போது என்னையும் அறியாமல் தீம்பிழம்பு நினைவு தான் வருகிறது.வேறென்ன எழுதினாலும் நிறைவதில்லை. கோளாறு பிடித்த மனது.

பாரதியின் வரிகளையும் நீங்கள் சொல்வீர்கள் என்று நினைத்தேன். அதே...எனக்கு மிகவும் படித்த வரிகள்.ஆனால் கவிதைக்கு இன்ஸ்பிரேசன் அந்த வரிகள் அல்ல...

நன்றி அண்ணா...