தோழிகள் புடைசூழ
சாலையில் நடக்கையில்
நீ சிந்துகின்ற சிரிப்புகளை
சேகரிக்கவே..உன்னைத் தொடர்ந்தேன்
சேகரித்த சிரிப்புகளில்
எனக்கானது எதுவென்று
தரம் பிரிக்கின்றேன்....
ஏதோ ஒரு சமயத்தில்
இடது புறம் தலை சாய்த்து
விழியின் ஓரத்திலிருந்து
ஒற்றைக் கீற்றை
என்மீது பாய்த்தாயே...
அந்த நேரச் சிரிப்பு
எனக்கானதா...?
பேருந்துக்குள் ஏறுகையில்
படியில் பாதம் வைத்து
நொடிப்பொழுது நோக்கினாயே
அக்கணச் சிரிப்பு
எனக்கானதா..?
பிரித்து வைத்த
சிறப்புச் சிரிப்புகளுடன்
உன் மாலை வருகைக்காய்
என் வேலை விடுத்து
காத்திருக்கிறேன்....
ஆய்வு செய்து அறிவித்துவிடு
இரண்டில் ஒன்றேனும்
எனக்காகவென்றால்
நான் உனக்கானவன் என
உறுதி செய்துகொள்கிறேன்!
Bookmarks