கருநிலவு

[அமரன்]

இருண்டு இருக்கையில்
மின்னும் மீன்களே...!
சிந்தையில் இருத்துங்கள்.
ஒளிநிலா மறையவில்லை
கருநிலவாய்க் காய்கிறது.

[சிவா.ஜி]

ஆட்டம் போடும் வால் பையன்களே
வாத்தியார் இருக்கிறார் மறந்து விடாதீர்கள். கரு நிலா ஒளி நிலா...அழகான கற்பனை. அசத்தல் அமரன்.

நில மகளின் கூந்தலில் மலர்களாய்
நட்சத்திரங்கள்...
அந்த பக்கம் உள்ள அழகு முகத்தில்
திலகமாய் திங்கள்.

[இளசு]

கிடைக்கும் இடைவெளியில்
மின்மினி ஆட்டம் காட்டுவது
(வால்) நட்சத்திரங்களின்
வாடிக்கைதானே.. அமரன்..!

இயற்பியல் உண்மைகளை மீறி
இயற்கையை நம் கருத்தேற்றிச் சொல்லும்
இனிய கவிதை..

சுருக்கமாய்.. கொஞ்சம் குறும்புடன்..

பாராட்டுகள் அமரன்!

[இனியவள்]

இருண்டு இருக்கையில்
மின்னும் மீன்களே...!
சிந்தையில் இருத்துங்கள்.
ஒளிநிலா மறையவில்லை
கருநிலவாய்க் காய்கிறது.

அருமை அமர் வாழ்த்துக்கள்

இது மானிடர்களுக்கு சொல்லும்
கருத்தாகப் படுகின்றது எனக்கு

நான் தோற்று விட்டாதாக
எண்ணி ஆனந்தப் படாதே
இது தற்காலிகமே வாழ்க்கை
என்னும் சக்கரத்தில் ஏற்றம்
தாழ்வு அனைவருக்கும்
சகயமானதே

நான் சொல்வது சரியோ

[ஆதவா]

மறைமுக உவமை.. சிவா. அதை சொன்னவிதம் அருமை.. இளசு அண்ணாவின் பாராட்டு உடனே பெற்றது கவிதைக்கு சிறப்பு.

தமக்குக் கிடைத்த இடத்தை பயன்படுத்தப்பார்க்கிறார்கள் மீன்கள்.. நிலவை நிந்திக்க அவசியமில்லாமல்.. ஆனால் இருக்கக்கூடும் சில மீன்கள்.. நிலவு மறைந்ததை ஒளிந்ததாக ஏற்கும் மீன்கள்.

சிறப்பாக அமைந்த கவிதையிது.. வாழ்த்துக்கள் அமரன்

[அமரன்]

நன்றி சிவா...
கருவை இரு வரிகளில் சொல்லிவிட்டீர்கள்.
அடுத்த வரிகள் இன்னொரு ஆனந்தம்.
தொடர்வோம்.

[அமரன்]

இளசு அண்ணா!
ஆமாம் அண்ணா ஆட்டம்போடும் வால் நட்சத்திரங்களை மனதில் வைத்தே எழுதினேன்.

வெந்த புண்களில்
வேலை பாய்ச்சுகின்ற

ஆறிய ரணங்களை
கீறிப்பார்க்கின்ற

வீண் மீன்களே.....!

ஒளிநிலா வரும்போது
மங்கிப்போவீர்கள்.

அளவோடு ஆடுங்கள்...

ஆதங்கத்துடன் வானத்தை பார்த்த எனக்கு தோன்றிய கவிதை இது..
அதனால் இயற்பியல் மீறிவிட்டதோ
குறும்பாகத்தான் சொன்னேன்..அத்துடன் கொஞ்சம் காரமாகவும்..

[ஓவியன்]

இருண்டு இருக்கையில்
மின்னும் மீன்களே...!
சிந்தையில் இருத்துங்கள்.
ஒளிநிலா மறையவில்லை
கருநிலவாய்க் காய்கிறது.

சுயமாய் ஒளிர்பவை
விண் மீன்கள்
நிலா போல்
கடன் வாங்கி
பூமி பின் அலையாமல்..........

கவிதை அருமை அமரா!.

[அமரன்]

ஓவியன்...

கடன் வாங்கினாலும்
கண்ணாய் இருப்பது நிலா..?

[அமரன்]

நில மகளின் கூந்தலில் மலர்களாய்
நட்சத்திரங்கள்...
அந்த பக்கம் உள்ள அழகு முகத்தில்
திலகமாய் திங்கள்.

சிவா..பின்னூட்டங்களில் காணப்படும் சில கவிதைகள் என் மனதில் ஒட்டிக்கொள்ளும். இன்று அப்படி ஒட்டிக்கொண்ட கவிதை இது..கணினியை விட்டு கண்களை விலக்கியும் என்னை விட்டு விலகாத கவிதை. அருமையான கற்பனை. கூந்தல்பூக்களாக நட்சத்திரங்கள். திலகமாக நிலா..பாராட்டுக்கள்..இது என்னை என்னமோ செய்கிறது. சிலநேரங்களில் அது கவிதையாகும் போது அது உங்களுக்கே சொந்தமானது...

[சிவா.ஜி]

நன்றி அமரன்.நல்ல ரசிகன் நீங்கள். உங்கள் கவிதையை ஆவலோடு எதிர்பார்க்கிறேன்.

[அமரன்]

இனியவள்..ஏதோ கிறுக்குகின்றேன். சமயத்தில் எனக்கே என்ன கிறுக்கியுள்ளேன் என்று தெரிவதில்லை. அதில் கருத்து இருப்பது தெரிகின்றது என்றால் அது உங்கள் திறமை. பின்னூட்டக்கவிதை அருமை.
---------------------------------------------------------
சிவா ரொம்ப எதிர்பார்க்காதீங்க சுமாரா எதிர்பாருங்க