அழுகிய விதைகள்

[தீபன்]

கருத்தரித்து உயிர் வரித்து
உருப்பெற்று உலகில்
விருத்தெரிந்த போது � நெஞ்சில்
விழுந்ததோர் வெட்டு...!
குழந்தைத் தனம் முடித்து,
குமரராய் எழுந்து குதித்தோம்
குவலயம் பஞ்சு என்றெண்ணி...!
நெஞ்சு வேகிய போதுதான்
நெருப்பு என்று புரிந்தது...!
பூஞ்சோலையெனத்தான் புகுந்தோம்,
வரவேற்றவை பூக்களல்ல
பூதங்கள்..!!
அப்பன் முதல் அரசன் வரை
பிளவுகளே எமக்கு
போதிக்கப்பட்டன....!
புன்னகை முகங்களில் - போர்வலைகள் பின்னப்பட்டன..!!
நேச நண்பரும் நீசச் சாதியாம்..-
பாசப் பெற்றோரே படையெடுத்தனர்!!
ஆண்மை அடக்குவதாம்...
பெண்மை அடங்குவதாம்...
இளகிய மன மண்ணில்
அழுகிய விதைகள்...!!
நேசம் மிகுந்தவனும்
நெஞ்சில் நிறைந்தவளை
�என்னவள்� எனத்தான் எண்ணுவான்
உயிராக அல்ல உடைமையாய்..!!!


-தீபன்.

[gragavan]

அருமையான கருத்துகள் தீபன். மாற வேண்டும் மக்கள் மனநிலை.

[பென்ஸ்]

வலிகளின் வேதனை மனதில் நிறைந்து கொண்டு
கழுத்தை இறுக்கி பிடிக்கும் போது
மூச்சு மூட்டி... கண்ணீர் கொட்டும்.

அந்த கண்ணீரால் எழுத பட்ட கவிதை என புரிகிறது...
வாழ்த்துகள் தீபன்.



பூஞ்சோலையெனத்தான் புகுந்தோம்,
வரவேற்றவை பூக்களல்ல
பூதங்கள்..!!

"எதிர்பாப்புகள் இல்லை என்றால் ஏமாற்றஙள் இல்லைதான்"...
என்று மன்றத்தில் நண்பர்கள் வரிக்கு வரி எழுத கண்டுள்ளேன்...
நான் போகும் இடங்களேல்லாம் பூ மெத்தைகள் விரிக்க பட மாட்டாது...
காலில் முட்கள் குத்தும் போது முள்ளை பிடுங்குவது போல்... இவற்றையும்....

புன்னகை முகங்களில் - போர்வலைகள் பின்னப்பட்டன..!!
நேச நண்பரும் நீசச் சாதியாம்..-
பாசப் பெற்றோரே படையெடுத்தனர்!!

தன் மகன் நியாயத்துகாக இருந்தாலும் நடு தெருவில்
பொறுக்கியாய் சண்டை இடும் போது, பெற்றோர் கண்டிக்க செய்யலாமா????

நெஞ்சில் நிறைந்தவளை
�என்னவள்� எனத்தான் எண்ணுவான்
உயிராக அல்ல உடைமையாய்..!!!


போர் வீரனின் ஆற்றாமை... அருமை...
உயிரை பிரிவது எளிது ஆனால் அவளை...????
கலக்கல் கவிதை....

[அறிஞர்]

வலியில் குரல்.. எங்கள் மனதை உலுக்குகிறது....

அருமையான குமுறல்....

வரும் சந்ததிக்கு நல்ல வழி உருவாக... வேண்டும் என வேண்டுவோம்...

[தீபன்]

பாராட்டுகளிற்கு நன்றி நண்பர்களே.

[தீபா]

வலிநிறைந்த கவிதை.... அருமை

[இளசு]

நிலம் புதிது..

விதை பழுது!

அடுத்தடுத்த புதுத்தலைமுறை மனநிலங்களும்
இப்படிப்பட்ட அழுகிய விதைகள் ஊன்றப்பட்டால்..?

நம்பிக்கை நலிகிறதே...!

தீபனின் குமுறலில் நியாயம் உள்ளது..பாராட்டுகள் தீபன்!


இங்கே பூமகள் குமுற.. நானிட்ட கோபச்சாபம்..
http://www.tamilmantram.com/vb/showthread.php?t=8687&page=6

சாபம் பலிக்காவண்ணம் மாறட்டும் மனநிலங்கள்..

[தீபன்]

எப்படியண்ணா முடியுது.... இப்படி நினைவு வைத்து தொடர்புதர... நானெழுதியதின்கீழ் என் பெயரில்லையென்றால் அது நானெழுதியதா என சந்தேகப்படும் மறதிபடைத்த எனக்கு உங்கள் நினைவாற்றல் பிரமிப்பாயிருக்கு.

[எஸ்.எம். சுனைத் ஹஸனீ]

வார்த்தைகளின் வரி வடிவம் கூடுதல் பாராட்டுக்குரியது.