PDA

View Full Version : உன் எழுத்தின் காடு



ஆதி
02-05-2013, 10:45 PM
பூக்காரியின்
லாவகமான விரல்களை போல*
மெல்லிய மயிலிறகால்
உன் நறுமணம் கமழும் சொற்களை
வெகு நேர்த்தியாய் கட்டிக் கொண்டிருக்கிறாய்

தூக்கனாங்குருவியின் கூட்டை போல*
நுட்பமானதாகவும்
நுண்பின்னல்கள் உடையதாகவும்
வேலைப்பாடு மிகுந்தவையாகவும் இருக்கும்
உன் சொற்கோர்வை

பள்ளி குழந்தையின்
பஞ்சுக்கைகளிலிருந்து உயர்கிற*
மலைகளையும் அதன் காட்டையும்
அதன் ரகசியங்களையும் அதனூடே
அரவமின்றி பாய்கிற நதிகளையும்
உன்னெழுத்துக்களின் இடுக்குகளில்
மிக சாமர்த்தியமாய் பதுக்கி வைப்பாய்

பெயரறியாத
பல பறவைகள் பறப்பதாகவும்
வண்ண மலர்கள் பூத்திருப்பதாகவும்
ஒரு அபூர்வ நட்சத்திரத்தினொளி படர்ந்திருப்பதாகவும்
புதிர்கள் பல நிறைந்திருப்பதாகவும் இருக்கும்
உன் எழுத்தின் காடு
அதிலொரு தேவதையாக*
நீ நடமாடி கொண்டிருப்பாய்

அதிகப்படியான ஜாக்ரதையோடு
உன் எழுத்தின் காட்டில் உலாவ ஆயத்தமாகிறேன்
அதன் ஒவ்வொரு தாழ்பாளையும் திறந்து
தேட காத்திருக்கிறேன்
ஏதேனும் ஒரு சொல்லில் எனக்கான*
அழைப்பு இருக்க கூடுமென*

நாஞ்சில் த.க.ஜெய்
03-05-2013, 05:21 AM
கடிதம் வரைவது கூட கவியாகிறதே கவிக்கு ..தொடரட்டும் ஆதி..

ஆதி
03-05-2013, 06:32 AM
நன்றி ஜெய், ஒரு படத்துக்கு எழுதிய கவிதை, இரவு படதையும் இணைக்கிறேன்

ஜான்
03-05-2013, 06:17 PM
புதிய புதிய வார்த்தைக் கோர்ப்புகள்

அழகிய பிரயோகங்கள்

A Thainis
04-05-2013, 06:51 AM
ஒரு எழுத்தின் காடு ஒரு இன்பக் கவிக்காடு, அழகு சொற்களால் பூத்து குலுங்குகிறது. வாழ்த்துக்கள் ஆதி.

அமரன்
04-05-2013, 10:53 AM
வைரமுத்துவின் வரிகள் என்று நினைக்கிறேன்..

காட்டைத் திறக்கும் சாவிதான் காற்று..

இந்தக் காட்டிலும் ஊடுருவி
எங்கும் நிறைந்த பரம்பொருளாய் காற்று..
காட்டைத் திறந்த காற்றா..
காட்டால் அடையுண்ட காற்றா?

தேடல் சுகம் ஆதி.

jpl
04-05-2013, 02:03 PM
///பூக்காரியின்
லாவகமான விரல்களை போல*
மெல்லிய மயிலிறகால்
உன் நறுமணம் கமழும் சொற்களை
வெகு நேர்த்தியாய் கட்டிக் கொண்டிருக்கிறாய்

தூக்கனாங்குருவியின் கூட்டை போல*
நுட்பமானதாகவும்
நுண்பின்னல்கள் உடையதாகவும்
வேலைப்பாடு மிகுந்தவையாகவும் இருக்கும்
உன் சொற்கோர்வை///

தங்களின் வார்த்தைகளிலேயே சொல்லாம்..

நுட்பான நுண்பின்னல் சொற்களில் நுண்ணுர்வுகளை இனிதாக உணர முடிகிறது.

//உன் எழுத்தின் காட்டில் உலாவ ஆயத்தமாகிறேன்//
நல்ல சொல்மாட்சிமை..

கீதம்
05-05-2013, 04:43 AM
ஓராயிரம் புதிர்களோடு காத்திருக்கும் எழுத்தின் காட்டுவழி தேடி எப்படியும் தன்னை வந்தடைவான் தனக்கான தேவன் என்னும் அதீத நம்பிக்கையோடான முறுவலோடு காத்திருக்கிறாள் அத்தேவதை. சொற்பின்னலின் நுட்பமறிந்த மனத்துக்கு தனக்கான அழைப்பு எவ்வார்த்தையிலிருக்கிறது என்பதைக் கண்டுபிடிப்பதா கடினம்? வாழ்த்துக்கள் ஆதி.