PDA

View Full Version : ஒரு கணம் சிந்திப்பாய்...!



கலைவேந்தன்
23-04-2013, 03:30 PM
ஒரு கணம் சிந்திப்பாய்...!

உள்மூச்சு வாங்கியே ஒருகணம் மயங்கி நீ
கள்ளுண்ணும் வண்டாய் மதிமயங்கும் போதும்

எள்ளிட்ட செக்கினில் நெய்வடிதல் போலே
தள்ளாமல் நீயவனைக் கலவிடும் போதும்

முள்மீது அமர்ந்த முதியவன் போல்நீ
தள்ளாமை கொண்டே தடுமாறும் போதும்..

வெள்ளாமை இல்லாத உழவனைப் போல்நீ
உள்ளுக்குள் மாண்டு மருகிடும் போதும்..

புள்ளின இணையதை புலையவன் குத்திட
சுள்ளெனச் சுருண்டிடும் இணையதைப் போல்நீ

உள்ளிய தெல்லாம் உருக்குலை யும்நாள்
தெள்ளிய நீரில் கற்களின் மோதலில்

மெள்ளவே எழும்பிடும் வளையமாய் உன்மனம்
உள்ளிடும் என்னை தவிர்ப்பையோ அதனை..?

கும்பகோணத்துப்பிள்ளை
23-04-2013, 06:47 PM
மாற்றானை மனந்த காதலி நம்மை மறந்தகாதலியல்ல!
மயஙகினாலும் முயங்கினாலும் முதுமையிலும்
நினைவலைகளில் நீந்தும் நம் நினைவுகள்.
உண்மைதான் உணரவைத்தது உங்கள் கவிதை
ஆனால் அது சாபமா?, சங்கடமா?, பாவமா?

கீதம்
23-04-2013, 10:35 PM
நம்பிக்கையிலும் எதிர்பார்ப்பிலும்தான் நகர்கிறது வாழ்க்கை. இலக்குகளின் திசையை காற்று தீர்மானிக்கும் காலத்தில் எய்தவனை நோவதோ? அம்பை நோவதோ?

மனவாழத்தில் கிடக்கும் ஏக்கங்களைப் பிரதிபலிக்கிறது கவிதையின் சொல்லாழமும் கருத்தாழமும். எடுத்தாளப்பட்ட உவமைகள் யாவும் அசத்தல்...

மனந்தொட்ட கவிதைக்குப் பாராட்டுகள் கலைவேந்தன்.

ரமணி
24-04-2013, 01:54 AM
கீதம் அவர்கள் சொல்லுவது போல உவமைகள் அருமை. 'எங்கிருந்தாலும் வாழ்க' என்று முடிந்திருந்தால் யதார்த்தமாக இருந்திருக்கும்.

jpl
25-04-2013, 04:42 PM
//உள்ளிய தெல்லாம் உருக்குலை யும்நாள்
தெள்ளிய நீரில் கற்களின் மோதலில்

மெள்ளவே எழும்பிடும் வளையமாய் உன்மனம்
உள்ளிடும் என்னை தவிர்ப்பையோ அதனை..?//

கலையின் சொல்லாடலைச் சொல்லவும் வேண்டுமோ?

சுகந்தப்ரீதன்
25-04-2013, 06:35 PM
மனமிணைந்த உள்ளங்களை மணமுடைத்த வேதனையை நுணுக்கமான எண்ணவோட்டங்களோடும் எடுத்துக்காட்டுகளோடும் எடுத்தியம்பிய விதத்தில் எளிதில் உணர்ந்துவிடமுடிகிறது... தீராத அக்காதலின் தீண்டலை..!!

ஆழமான உணர்வோவியமாய் ஒளிரும் வரிகளுக்கு வாழ்த்துக்கள் கலையண்ணா..!!:icon_b:

A Thainis
26-04-2013, 07:43 AM
உவமைகைளில் உண்மைகள் பட்டென்று தெரிக்கின்றன
ஊமைகளின் வலியும் உரக்க சொல்லப்பட்டுள்ளன வாழ்த்துக்கள் கலை.