View Full Version : ஔவையின் மூதுரை
ஜானகி
21-01-2013, 03:15 AM
என்றோ ஔவைப்பாட்டி சொன்ன மூதுரைகள் இன்றும் நமக்கு வழிகாட்டியாக உள்ளன.... உதாரணத்திற்குச் சில.....
அடுத்து முயன்றாலும் ஆகுநாளன்றி
எடுத்த கர்மங்களாகா- தொடுத்த
உருவத்தால் நீண்ட உயர் மரங்களெல்லாம்
பருவத்தாலன்றிப் பழா.
என்னதான் அடுத்தடுத்து முயற்சி செய்தாலும், ஒவ்வொன்றும் நிறைவேறக்கூடிய சமய சந்தர்ப்பம் வாய்த்தாலன்றிக் கைக்கொண்ட எந்தக் காரியமும் முடிவதில்லை !
கிளைகள் விட்டு நெடிது உயரும் மரங்கள், எவ்வளவுதான் பெரியதாக விளங்கினாலும், அவையெல்லாம் காய்க்கும் பருவம் வந்தாலன்றிப் பழுப்பதில்லை !
பண்டு முளைப்ப தரிசியே யானாலும்
விண்டுமி போனால் முளையாதாம்- கொண்டபேர்
ஆற்றலுடையார்க்கும் ஆகா தளவின்றி
ஏற்ற கருமஞ் செயல்.
நெல்லில் உள்ள உமி நீங்கிவிட்டால் அரிசி முளைக்காது.
அதுபோல, பெரும் ஆற்றல் வாய்ந்த திறமைசாலியானாலும், பக்கபலம் இல்லாவிட்டால், அவர்கள் எடுத்துக்கொண்ட காரியம் சுலபமாக முடிவதில்லை.
M.Jagadeesan
21-01-2013, 08:18 AM
திருக்குறளுக்கு அடுத்தபடியாக என்னைக் கவர்ந்தது ஒளவையின் பாடல்களே. தினமும் ஒரு பாடலை , உரையுடன் தந்து வரவும். ஜானகி அவர்களுக்கு நன்றி
ஜானகி
22-01-2013, 12:00 AM
மடல் பெரிது தாழை மகிழினிது கந்தம்
உடல் சிறியர் என்றிருக்க வேண்டா- கடல் பெரிது
நன்னீருமாகாது அதனருகே சிற்றூறல்
உண்ணீருமாகி விடும்
தாழம்பூவின் மடல் பார்வைக்கு மிகப் பெரியதாகத் தோன்றும் மகிழம்பூவோ பார்வைக்கு மிகச் சிறியதாகத் தோன்றினாலும், அதன் மணம் மிக இனிமையாக இருக்கும்.
ஆரவாரமான கடல் பார்வைக்கு மிகப் பெரிதுதான் ; ஆனால் அதன் உப்புநீர் குளிப்பதற்குக்கூட பயன்படாது.
அதன் கரையருகேயுள்ள சிறு மண்குழியின் ஊற்றுநீரோ குடிக்கவும் பயன்படும்.
ஆகவே எவரையும் உருவத்தை மட்டும் பார்த்து எடைபோடாதே.
ஜானகி
23-01-2013, 12:27 AM
ஒன்றை நினைக்கின் அது ஒழிந்திட்டு ஒன்றாகும்
அன்றி அது வரினும் வந்தெய்தும்- ஒன்றை
நினையாத முன்வந்து நிற்பினு நிற்கும்
எனையாளும் ஈசன் செயல்
ஒன்றைநினைத்தல், அது ஒழிந்துபோய் வேறுஒன்று ஆகிவிடும்; அல்லது அது வந்தாலும் வந்துவிடும்
ஒன்றை நினைப்பதற்குமுன் அது நம்முன்னே வந்து நிற்கும்....
எல்லாம் இயற்கைனூடே எம்மை ஆட்டுவிக்கும் இறைவன் செயல் !
பயனைக் கருதாமல், விளைவுகளைப் பொருட்படுத்தாமல் செயல்படுக.
M.Jagadeesan
23-01-2013, 01:33 AM
" நினைப்பதெல்லாம் நடந்துவிட்டால் தெய்வம் ஏதுமில்லை " என்ற கண்ணதாசனின் வரிகள் ஈண்டு நினைவுக்கு வருகிறது.
ஜானகி
24-01-2013, 12:33 AM
வருந்தி அழைத்தாலும் வாராத வாரா
பொருந்துவன போமின் என்றாற் போகா- இருந்தேங்கி
நெஞ்சம் புண்ணாக நெடுந்தூரந் தாநினைந்து
துஞ்சுவதே மாந்தர் தொழில்.
பொருந்தி வராதவைகளை எவ்வளவு பிரயாசைப்பட்டு வருந்தி அழைத்தாலும் வருவதில்லை;
பொருந்தி இருப்பவைகளைப் போ என்றாலும் போவதில்லை.
விரும்பும் இன்பம் வருவதுமில்லை; வேண்டாத துன்பம் போவதுமில்லை.
இதை நினைத்து நினைத்து ஏங்கி நெஞ்சம் புண்ணாகி வாழ்நாள் முழுவதும் சிந்தித்து மாய்வதே மனிதன் தொழிலாகிவிட்டது.
M.Jagadeesan
24-01-2013, 06:35 AM
ஒட்டுவதுதான் ஓட்டும்; நாம் எவ்வளவுதான் பொருள் ஈட்டினாலும்; அவ்வளவையும் நம் அனுபவிக்கமுடியாது. ஒளவையின் நீதி உணர்ந்து போற்றத்தக்கது.
கும்பகோணத்துப்பிள்ளை
24-01-2013, 11:06 AM
என்னத்ததான் எண்ணைய தடவிண்டு தரையில உருண்டாலும் ஒட்ற மன்னுதானே ஒட்டும்!
ஜானகி
25-01-2013, 12:03 AM
ஆழ அமுக்கி முகக்கினும் ஆழ்கடல்நீர்
நாழி முகவாது நா நாழி - தோழி
நிதியும் கணவனும் நேர்படினும் தந்தம்
விதியின் பயனே பயன்.
ஆழ்கடலில் ஆழமாக அமுக்கி முகந்தாலும், ஒருபடிப் பாத்திரம் நான்குபடி நீரைக் கொள்ளாது.
அதுபோல,பெண்களுக்கு, பொருளும், கணவனும் கிடைத்தாலும், அவரவர் விதியாகிவிட்ட சுபாவப் போக்கைப் பொறுத்தே எதையும் அனுபவிப்பார்கள்.
ஜானகி
26-01-2013, 12:18 AM
எழுதியவாறே காண் இரங்கு மடநெஞ்சே
கருதியவாறாமோ கருமம்- கருதிப் போய்க்
கற்பகத்தைச் சார்ந்தோர்க்குக் காஞ்சிரங்கா ஈந்ததேல்
முற்பருவத்திற் செய்த வினை
எந்தக் காரியமும் நினைத்தவுடன் நினைத்ததுபோல முடிந்துவிடுவதில்லை
எல்லாம் கொடுக்கும் கற்பக மரத்தைத் தேடிச் சென்றாலும் அது எட்டிக்காயைக் கொடுப்பதுண்டு.
எல்லாம் முன் வினைகளைப் பொறுத்தது.
முன்வினைப் பயன் என்பது ஔவையின் பாடல்களில் சற்று அதிகமாகவே சொல்லப் பட்டுள்ளதோ?
ஜானகி
27-01-2013, 01:29 AM
வினைப்பயனை வெல்வதற்கு வேதமுதலாம்
அனைத்தாய நூலகத்தும் இல்லை- நினைப்பதனைக்
கண்னுறுவதல்லாற் கவலைப்படேல் நெஞ்சே மெய்
விண்ணுறுவார்க்கில்லை விதி
செயலின் பயனை வெல்வதற்கு வேதம் முதலான நூல் அனைத்திலும் எந்த உபாயமும் இல்லை.
மனமே கவலைப் படாதே !
நம் நினைப்பைப் போலக் கண்ணில் படுவதெல்லாம் பலவித பாவனைகளாகத் தோன்றுமே தவிர, வெட்டவெளியை நோக்கி நிற்கும் உண்மையான அறிவாளிகளுக்கு விதி என்பது ஒன்றுமில்லை !
குணமதி
31-01-2013, 01:31 AM
பண்டு முளைப்ப தரிசியே யானாலும்
விண்டுமி போனால் முளையாதாம்- கொண்டபேர்
ஆற்றலுடையார்க்கும் ஆக தளவின்றி
ஏற்ற கருமஞ் செயல்.
ஆக தளவின்றி - ஆகா தளவின்றி என்று திருத்தவேண்டுமெனக் கருதுகிறேன்.
ஜானகி
31-01-2013, 01:54 AM
திருத்திவிட்டேன். சுட்டிக்காட்டியதற்கு நன்றி.