PDA

View Full Version : குற்ற வுணர்ச்சி



சொ.ஞானசம்பந்தன்
14-01-2013, 07:29 AM
காரைக்காலில் எங்கள் வீட்டுக்கு எதிர் இல்லத்து மாடியில் பல் மருத்துவர் கபீர்தாஸ்

வசித்துக்கொண்டு அங்கு கிளினிக்கும் நடத்தினார் . புதுச்சேரியிலிருந்து வந்திருந்த அவர்

மணமாகாத இளைஞர் . எங்கள் நோய்களுக்கு அவரை நாடியதால் காலப் போக்கில் நெருக்கம்

முகிழ்த்தது . உணவகத்தில் சாப்பிட்டுக்கொண்டிருந்த அவருக்கு நாங்கள் சமைக்கும் உணவு

வகைகளுள் சிலவற்றை அவ்வப்போது வழங்கினோம் ; முன்கூட்டியே தகவல் தெரிவித்துவிடுவோம் .

ஒரு நாள் , கோழி பிரியாணி தருவதாய் அறிவித்துவிட்டு மதியம் கொடுத்தோம் .

விடுமுறை நாள்களில் , என் மனைவியும் ஐந்து பிள்ளைகளும் நானும் வட்டமாய் அமர்ந்து

( தரையில்தான் ; சாப்பாட்டு மேசை பழக்கத்துக்கு வராத காலம் ) உரையாடியபடி உண்பது

வழக்கம் : பிள்ளைகள் அரசு பள்ளிகளில் தமிழ்வழி பயின்றவர்கள் ; அவை வெவ்வேறு பள்ளிகள் ;

நானும் அரசு பள்ளி ஆசிரியர் . ஆக ஆறு பாடசாலைகளில் நிகழ்ந்த முக்கிய சம்பவங்களை

அவரவரும் சொல்வோம் ; இவையன்றிப் பொதுவான விஷயங்களும் இடம்பெறும். .

மிக்க சுவையாய் இருந்தால் உண்டு முடித்த பின்பும் உட்கார்ந்தபடியே பேசிக்கொண்டிருப்போம் .

அன்று , பக்கத்து இல்லத்தரசி , தமது வீட்டிலிருந்து ( ஓட்டு வீடுகள் : பேசுவது கேட்கும் )

" சாப்பாட்டு நேரமா ? நானும் வரட்டுமா ? " என வினவினார் .

" வாங்க , வாங்க ; கோழி பிரியாணி ! " என்றேன் .

அவர் உடனே , " கோழியா ? இன்னைக்கு அமாவாசை ஆச்சே ! " என்றதும் நான் மௌனித்தேன் ;

குற்ற வுணர்ச்சி கொண்டேன் ; அமாவாசையில் அசைவம் சாப்பிட்டதற்காக அல்ல . ( நாங்கள் நாள்

நட்சத்திரம் பார்ப்பதில்லை . விரதம் எதுவும் கடைப்பிடிப்பதில்லை ) ; தந்தையை இழந்திருந்த ஒருவரின்

விரதத்துக்குப் பங்கம் ஏற்படுத்தியதை எண்ணித்தான் வருந்தினேன் .

அருந்தி முடிந்ததும் அவரிடம் சென்றேன் ; " மன்னிக்கணும் , அமாவாசை இன்னு தெரியாமே

அசைவம் கொடுத்திட்டோம் " அவர் பதில் அளித்தார் : " பரவாயில்லை , இதற்கு முன்னாலும்

சில தடவை இப்படி ஓட்டலில் சாப்பிட்டிருக்கேன் ; வருத்தப்பட வேணாம் "

உண்மைதானா? அல்லது என்னைச் சமாதானப்படுத்த அப்படிச் சொன்னாரா ? தெரியவில்லை .

திருமணம் புரிந்துகொண்டு சில ஆண்டு கழித்துச் சொந்த ஊர் போய்விட்ட அவரது

அகாலச் சாவுச் செய்தி எங்களைப் பெருந் துயரில் ஆழ்த்திற்று .

==========================================

aren
14-01-2013, 09:55 AM
கடைசி வரியைப் படிக்கும்வரை மிகவும் சுவாரசியமாக இருந்தது, ஆனால் கடைசி வரியைப் படித்தவுடன் மனதை ஏதோ செய்கிறது.

M.Jagadeesan
15-01-2013, 04:04 AM
வெள்ளிக்கிழமை , அமாவாசை, கிருத்திகை மற்றும் பண்டிகை நாட்களில் அசைவம் தவிர்ப்பது நல்லது.

சொ.ஞானசம்பந்தன்
17-01-2013, 05:57 AM
கடைசி வரியைப் படிக்கும்வரை மிகவும் சுவாரசியமாக இருந்தது, ஆனால் கடைசி வரியைப் படித்தவுடன் மனதை ஏதோ செய்கிறது.

பின்னூட்டத்துக்கு மிக்க நன்றி . கடைசிச் செய்தியை எழுதுவதா வேண்டாமா என நெடு நேரம் யோசித்தேன் . அந்தத் துக்கம் இன்னமும் என் மனத்தில் கப்பியுள்ளதால் அதை வெளிப்படுத்தினேன் . வாழ வேண்டிய வயதில் பலர் இறக்க நேர்கிறது . கனி இருக்கக் காய் உதிர்வதுண்டு என்று இலக்கியம் சொல்கிறது .

சொ.ஞானசம்பந்தன்
17-01-2013, 05:59 AM
வெள்ளிக்கிழமை , அமாவாசை, கிருத்திகை மற்றும் பண்டிகை நாட்களில் அசைவம் தவிர்ப்பது நல்லது.

பெரும்பாலார்க்கு உங்கள் கருத்துதான் . எங்கள் குடும்பத்தின் கருத்து மாறுபடுகிறது . பின்னூட்டத்திற்கு மிகுந்த நன்றி .