PDA

View Full Version : கால்கள்



இராஜிசங்கர்
18-09-2012, 04:35 AM
வணிக நோக்கில் வந்து
வஞ்சம் செய்த அந்நியர்களுக்கு
வந்தனம் செய்ய வளைந்த
கால்கள் போன பாதையிது!

உயிரினையொரு பொருட்டாய் மதியாமல்
உரிமைப்போரில் களம் இறங்கி
உணர்ச்சிப்பிழம்பாய் விறைத்து நின்ற
கால்கள் போன பாதையிது!

தங்கத்தகட்டில் செதுக்கி வைத்து
தாமரைப்பூவில் துடைத்து வைத்து
தத்தித்தத்தி நடைபோடும் தளிர்பிஞ்சுக்
கால்கள் போன பாதையிது!

சீரும் சிறுத்தை வேகம் கொண்டு
சீராய் நாளும் அடியெடுத்து
சிட்டாய்ப் பறக்கும் பள்ளிச்சிறார்கள்
கால்கள் போன பாதையிது!

ஓய்வு அறியா உழைப்பினாலே
ஓய்ந்து கிடந்த மனதிற்கு உரமூட்டி
விடியும்விடியுமென உயிர்த்துநின்ற வீணாசைவிவசாயிகளின்
கால்கள் போன பாதையிது!

குடியைக் கெடுத்த குடிமகன்களின்
குடும்பத்தலைவிகள் விதியை நொந்து
வீடுவீடாய் வேலைபார்த்து ஓய்ந்துதிரும்பும்
கால்கள் போன பாதையிது!

கள்ளமில்லா உள்ளம் படைத்தும்
கடவுளவன் கஞ்சத்தனத்தினால் குறைகொண்டு
பிறந்திருந்தும் குணம்குறையா வல்லவர்களின்
கால்கள் போன பாதையிது!

ஆணாதிக்க சமுதாயத்தின்
ஆணிவேர்களை அகற்றிடவே
அடியெடுத்து முதல் வைத்த பெண்ணவளின்
கால்கள் போன பாதையிது!

திசைதெரியாமல் திணறித்திரியும்
கால்களே! கேளுங்கள்!
பாதைகள் பலப்பல ஆயினும்
சென்று சேரும் இடம் ஒன்றுதானென அறியுங்கள்!

முன்னேற்றப்பாதையில் முனைந்திருக்கும்
கால்களே! கேளுங்கள்!
வீட்டை மட்டும் உயர்த்தவல்ல -
நாட்டையும் உயர்த்த நடைபழகுங்கள்!

நேரத்தின் சிறகிலேறிப்பயணிக்கும்
கால்களே! கேளுங்கள்!
ஓட எத்தனிக்கும் முன்
உறுதியாய் நிற்கக் கற்றுக்கொள்ளுங்கள்!

முட்டி மோதிப் போராடும்
கால்களே! கேளுங்கள்!
மனிதமென்ற நேர்பாதையில் செல்லுங்கள்!
வெற்றித்திருமகள் காத்திருப்பாள் விழிநிறைத்து வரவேற்க!

கீதம்
18-09-2012, 05:34 AM
நேரத்தின் சிறகிலேறிப்பயணிக்கும்
கால்களே! கேளுங்கள்!
ஓட எத்தனிக்கும் முன்
உறுதியாய் நிற்கக் கற்றுக்கொள்ளுங்கள்!

மிகவும் ரசித்த வரிகள் ராஜி. கால்களைக் கொண்டு பலதரப்பட்ட மனிதர்களை அடையாளம் காட்டியவிதம் அருமை. முடிவில் எல்லாக்கால்களையும் சரியான பாதை நோக்கித் திருப்பிய அழகை ரசித்தேன். பாராட்டுகள் ராஜி. இந்தக் கவிதை கவிதைப்பட்டறையில் இருப்பதை விடவும் கவிதைகள் பகுதியில் இருப்பதே பொருத்தமென்று தோன்றுகிறது.


அடியெடுத்து முதல் வைத்த பெண்ணவளின் என்ற வரி,

முதலடி எடுத்துவைத்தப் பெண்ணவளின்

என்று இருந்தால் நன்றாக இருக்குமென்று நினைக்கிறேன்.

நாஞ்சில் த.க.ஜெய்
18-09-2012, 09:13 AM
பிறழும் கால்கள் செல்லும் பாதையும் செல்ல வேண்டிய பாதையயும் கூறும் கவிதை..பாராட்டுக்கள் ராஜிசங்கர் அவர்களே..

ஜானகி
18-09-2012, 01:12 PM
காலடிகளின் பெருமையை எடுத்துரைக்கும்
பாடலடிகள் சுட்டும் பாதையைக் கவனிப்போமாக....
தேடல்களின் திசை நோக்கிப் பயணிப்போமாக !

சுகந்தப்ரீதன்
18-09-2012, 03:22 PM
மனிதர்களின் கால்கள் செல்லும் பாதையை பற்றி முன்னுரையில் வரைவுரை தந்து பின்னுரையில் மனிதம் நாடி அறிவுரை தந்திருக்கும் பாங்கு நன்று..!!:icon_b:


விடியும்விடியுமென உயிர்த்துநின்ற வீணாசைவிவசாயிகளின் இராஜியக்கா.. நாலு வரியிலியேதான் பத்தி அமையனும்ன்னு ஏதேனும் பத்தியமா..?! இந்த வரியை ரெண்டாக்கியிருக்கலாமே... அல்லது இவ்வரியில் வார்த்தைகளை சுருக்கியிருக்கலாமே..?!:)

A Thainis
18-09-2012, 03:53 PM
முன்னேற்றப்பாதையில் முனைந்திருக்கும்
கால்களே! கேளுங்கள்!
வீட்டை மட்டும் உயர்த்தவல்ல -
நாட்டையும் உயர்த்த நடைபழகுங்கள்!

:icon_b:அழகு வரிகள் இனிய கவிதை வாழ்த்துக்கள் இராஜிசங்கர்.

jayanth
20-09-2012, 04:46 AM
படித்துவிட்டு ஒண்ணூமே சொல்லமப் போனா முறையில்ல....
அதனால....

கால்கள்...முடமில்லா திடகாத்திரம்...!!!