ஆனாலும் அவன் நடக்கிறான்.

[Vel Tharma]

இருளே வழியானது

துயரே துணையானது

எங்கும் அவலங்கள்

கூக்குரல்களே இசையானது

ஆனாலும் அவன் நடக்கிறான்.

.

துணைக்கென வந்தோர்

துரோகிகளாயினர்

தீர்க்கவென வந்தோர்

தீர்த்துக் கட்டினர்

ஆனாலும் அவன் நடக்கிறான்.

.

பாரா முகங்களே

பழக்கங்கள் ஆயின

அள்ளி வைப்போரே

அருகில் நின்றனர்

ஆனாலும் அவன் நடக்கிறான்.

.

அடுத்துக் கெடுப்போரே

அயலவர் ஆகினர்.

தடுக்க வேண்டியோரே

தண்டம் கொடுத்தனர்.

ஆனாலும் அவன் நடக்கிறான்.

.

பொய்களை பலவற்றை

திருப்பி திருப்பிச் சொல்லி

உண்மையாக்கினர்.

ஆனாலும் அவன் நடக்கிறான்.

.

உண்மைகளை எல்லாம்

திருப்பி திருப்பி தாக்கிப்

பொய்களாக்கினர்.

ஆனாலும் அவன் நடக்கிறான்.

.

எல்லாமே இழந்தாலும்

நம்பிக்கை இழக்காததால்

கீழ்த்திசையில் ஒரு ஒளிக்கீற்றை

நோக்கி அவன் நடக்கின்றான்

[அமரன்]

கடைசில சொன்னீங்க பாருங்க.. அதுதாங்க தேவையான வரம்..
நம்பிக்கை..
இந்தக் கை மட்டும் இருந்தால் மேற்கைக் கிழித்துக் கூட உதயம் காணலாம்..

பாராட்டுகள்.. ஏதோ ஒன்று ரசனையைக் கூட்டுது.

உறுப்பினர் அறிமுகப்பகுதியில் உங்களையும் அறிமுகம் செய்து கொள்ளுங்களேன் தர்மா

[எஸ்.எம். சுனைத் ஹஸனீ]

தும்பிக்கையையும் விட வலுவானது நம்பிக்கை. கவிதையுடன் மன்றம் வந்த தர்மாவுக்கு வாழ்த்துக்கள்.

[சுகந்தப்ரீதன்]

இப்படித்தான் தர்மா, “போற்றுவார் போற்றலும் தூற்றுவார் தூற்றலும் போகட்டுமென் கண்ணனுக்கே”-ன்னு சொல்லிட்டு போய்க்கிட்டே இருக்கனும்..!!

நம்பிக்கையூட்டும் நல்லதொரு கவிதை... வாழ்த்துக்கள்..!!