அப்படியே தான் இருக்கிறாய் தாயே

[ஆதி]

அறிவும் சுடரும்
அடர்ந்திருந்த போதும்
அன்பும் கண்ணீரும்
பெருகி வழிந்த போதும்
உறவும் உரசலும்
ஊற்றெடுத்து கொண்டிருந்த போதும்
உரிமையும் உடமையும்
ஊடாடி கொண்டிருந்த போதும்
சிரிப்பும் சிந்தனையும்
செரிந்திருந்த போதும்
கருத்தும் மோதலும்
கைகுலுக்கி கொண்டிருந்த போதும்
கலையும் கலாச்சாரமும்
கரை புரண்டிருந்த போதும்
படைப்பும் இலக்கியமும்
பரந்திருந்த போதும்
ஆன்றோரையும் சான்றோரையும்
அடையும் பாலமாய் இருந்த போதும்
சொல்லும் சிலம்பமும்
சுழன்று கொண்டிருந்த போதும்
பாசமும் பரிவும்
பால் மழையாய் பொழிந்த போதும்
நட்பில் நேசத்தில்
நனைந்த பூமியாய் இருந்த போதும்
விளையாட்டும் வேடிக்கையும்
விரவி கிடந்த போதும்
அப்படியே தான் இருந்தாய் தாயே
நீ
அப்படியே தான் இருந்தாய்

நிச்சலனமும் மௌனமும்
நிரம்பி பொங்கும் போதும்
அப்படியே தான் இருக்கிறாய் தாயே
நீ
அப்படியே தான் இருக்கிறாய்

புத்தனை போலவே